Demografııalyq úderisterdi taldaý jáne boljaý ortalyǵy qurylady — Joldaý

ASTANA. KAZINFORM — Memleket basshysy Qasym-Jomart Toqaev eldegi demografııalyq úrdisterdi egjeı-tegjeıli zerdelep, uzaq jylǵa arnalǵan sheshimder qabyldaý aıryqsha mańyzdy ekenin basa aıtty. 

— Alaıda osy salada málimetterdi tıisti deńgeıde esepke alyp, taldaý jasaý jolǵa qoıylmaǵan. Bul jaǵdaı eńbek naryǵynyń suranysyn boljaý, ınfraqurylymdy damytý jumysyn josparlaý jáne basqa da mindetterdi oryndaý jolynda qıyndyq týǵyzady. Strategııalyq josparlaý jáne reformalar agenttiginiń bazasynda aýqymdy derekter men jasandy ıntellekt tehnologııalary engizilgen Demografııalyq úderisterdi taldaý jáne boljaý ortalyǵyn qurý kerek, - dedi Prezıdent. 

Memleket basshysynyń málimdeýinshe, demografııa jáne eńbek naryǵyndaǵy úrdister zeınetaqy júıesine qatysty ustanymdardy qaıta qaraý qajet.

— Azamattardyń, ásirese, óz-ózin jumyspen qamtyp otyrǵan adamdardyń zeınetaqy jınaǵy az ekeni baıqalady. Úkimet Ulttyq bankpen, sondaı-aq Strategııalyq josparlaý jáne reformalar agenttigimen birlese otyryp zeınetaqy júıesiniń qarjylyq turaqtylyǵyn nyǵaıtý, zeınetaqy tólemderiniń uzaq ýaqyt boıy teńgerimdi jáne laıyqty deńgeıde bolýyn qamtamasyz etý sharalaryn oılastyrýy kerek. Azamattardyń qarjylyq saýattylyǵyn arttyrý máselesi áli de ózekti. Osy rette «AMANAT» partııasy usynǵan «Qaryzsyz qoǵam» jobasyn júzege asyrýdy jalǵastyrý kerek. Byltyrdyń ózinde osy joba aıasynda 845 myń adam saýatyn jetildirip, zańgerlik keńes aldy. Túpki maqsat — halyqtyń moınyndaǵy qaryzyn azaıtý ǵana emes, azamattardyń tabysy turaqty bolýyn qamtamasyz etý, — dep naqtylady Prezıdent.

Buǵan deıin Qasym-Jomart Toqaev jumysshy mamandyqtaryna qurmetti arttyrý negizgi mindettiń biri ekenin tilge tıek etti.