Demografııa máseleleri boıynsha memlekettik organ quryla ma – Úkimet basshysynyń jaýaby
ASTANA. KAZINFORM – Premer-Mınıstr Oljas Bektenov Senat depýtattarynyń demografııa máseleleri boıynsha memlekettik organ qurýǵa qatysty saýalyna jaýap berdi.
«Táýelsizdik alǵan jyldary Qazaqstannyń halyq sany 16,5 mln adamdy, ómir súrý uzaqtyǵy 68 jasty qurady. Sol kezde elimizdegi demografııalyq jaǵdaıdy eskere otyryp, demografııa máselelerimen arnaıy qurylǵan Kóshi-qon jáne demografııa agenttigi aınalysty. Qabyldanǵan keshendi sharalar negizinde aıtarlyqtaı jetistikterge qol jetkizildi jáne áleýmettik damý jolynda úlken qadam jasaldy. Júrgizilgen áleýmettik-ekonomıkalyq reformalardyń nátıjesinde halyqtyń tabysy ulǵaıdy. Densaýlyq saqtaý men bilim berý salalarynyń qomaqty qarjylandyrylýy, ana men balany qoldaýǵa arnalǵan júıeli sharalar bala týý men ómir súrý uzaqtyǵynyń ósýine úlken áser etti. Sonyń nátıjesinde qazirgi tańda Qazaqstan halqynyń sany 20 mln-nan asty, qazaqstandyqtardyń ortasha jasy 32,1 jasty qurady. Halyq qurylymynda úshten biri - balalar, 58 paıyzy - eńbekke qabiletti azamattar jáne 11 paıyzy - qart adamdar. Osylaısha, elimizdiń halqy basqa eldermen salystyrǵanda jas», - dedi Úkimet basshysy jaýabynda.
Sonymen qatar, onyń atap ótýinshe, tabysyna qaramastan barlyq otbasylarǵa bala týýǵa, 1,5 jasqa deıingi bala kútimi boıynsha jumys istemeıtin áıelderge, múgedek balalardy tárbıeleýge, 18 jasqa tolmaǵan 4 jáne odan kóp balasy bar kóp balaly otbasylarǵa jáne kóp balaly analarǵa memlekettik qoldaý kórsetiledi. Ómirde qıyn jaǵdaıǵa tap bolǵan otbasylarǵa bul tólemderge qosymsha ataýly áleýmettik kómek taǵaıyndalady. Osylaısha, búginde árbir besinshi qazaqstandyq otbasy memlekettik qoldaý alady. ıAǵnı memlekettik qoldaýdyń keshendi sharalarynyń nátıjesinde demografııalyq jaǵdaı jaqsardy.
«Senat depýtattary usynystarynyń negizinde qosymsha halyqaralyq tájirıbege taldaý júrgizildi. Onyń qorytyndysy kórsetkendeı, demografııa máselelerimen ártúrli memlekettik organdar aınalysady. Mysaly, týý deńgeıi tómen elderde (Koreıa, Qytaı) densaýlyq saqtaý mınıstrligi jaýapty, postkeńestik jáne Shyǵys Eýropa memleketterinde (Reseı, Ýkraına, Polsha, Slovakııa) bul fýnktsııalar áleýmettik máselelerge jaýapty memlekettik organdarǵa júktelgen. Demografııalyq damý salasyndaǵy memlekettik saıasat – fýnktsıonaldyq baǵyttaryna sáıkes árbir ortalyq memlekettik organdardyń jumysyna engizilgen. Memlekettik organdar ózderiniń salalyq baǵyty boıynsha ákimshilik, ekonomıkalyq jáne basqa da is-sharalardy qabyldaı otyryp, demografııalyq saıasattyń tutas júıesin qalyptastyrady. Bul jumystardy Ulttyq ekonomıka mınıstrligi úılestiredi. Osyǵan oraı bul máseleni jan-jaqty qaralyp, Ulttyq ekonomıka mınıstrligi ortalyq memlekettik organdarǵa júrgizgen fýnktsıonaldyq taldaý qorytyndysy boıynsha jańadan qosymsha memlekettik organdqurý, memlekettik qyzmetshiler sanyn ulǵaıtý, memlekettik bıýdjetke júkteme túsirý orynsyz dep sanaıdy. Sonymen qatar jeke vedomstvo qurý Memlekettik basqarýdy damytýdyń 2030 jylǵa deıingi tujyrymdamasynda kózdelgen memlekettik apparatty ońtaılandyrý baǵytyna sáıkes kelmeıdi», - dedi Oljas Bektenov.
