Demeýshiler tabyldy: Almaty botanıkalyq baǵyndaǵy jylyjaı qurylysy jalǵasady

ALMATY. KAZINFORM – Almatynyń botanıkalyq baǵy qýanyshty jańalyqpen bólisti.

Botanıkalyq baq aýmaǵynda 1969 jyly salynǵan ekspozıtsııalyq jylyjaıdy qaıta qalpyna keltirý jumystary 2022 jyldyń kókteminde bastalǵan. Biraq sol jyldyń sońynda jaýapsyz merdiger jumysty aıaqtamaı tastap ketken.

Sondyqtan ótken mamyr aıynda Almatynyń bas botanıkalyq baǵy kúrdeli jaǵdaıǵa baılanysty kómekke muqtaj ekenin ashyq aıtyp, demeýshiler izdep jatqanyn jarııalady.

Búgin botanıkalyq baqtyń baspasóz qyzmeti oranjereıany jóndeýge kómektesetin demeýshiler tabylǵanyn málimdedi.

- Eki jyl boıy josyqsyz qyzmet kórsetýshige qatysty sot protsesi júrip jatqanda, biz barlyq quzyrly organdardan kómek suradyq, BAQ arqyly málimdeme jasadyq. Nátıjesinde biz jobany qarjylandyrýdyń birneshe kózderimen kelissózder júrgizip, qurylys jumystaryn qaıta bastaý úshin kómek ala aldyq. Qazirgi ýaqytta KAZ Minerals kompanııasy men Qazaqstannyń bıoalýantúrlilikti saqtaý qory arasynda 100 mln teńge kóleminde demeýshilik kómek bólý týraly kelisimge qol qoıyldy. Kelisimniń bir bóligi Almaty qalasynyń Bas botanıkalyq baǵynyń jylyjaıyn qaıta qurý jumystaryn qamtıdy. Al basqa demeýshilermen kelisimder bekitý jáne qol qoıý satysynda, - dep habarlady baqtan.

Resmı málimetke sáıkes, aıtylǵan kelisim negizinde bıyl 22 sáýirde «Botanıka jáne fıtoıntrodýktsııa ınstıtýty» RMK, «Qazaqstannyń bıoalýantúrlilikti saqtaý qory» QF jáne merdiger «Almaty Aqsý» JShS arasynda jobany júzege asyrý týraly úsh jaqty kelisimge qol qoıyldy.

Endi bólingen qarajat aıasynda jylyjaıdyń eki blogynda - №3 blokta jáne №8 «Palmarıým» blogynda jumystar júrgiziletin bolady. Kelisimshartqa sáıkes merdiger: metall konstrýktsııalar men fermalardy demontajdaý, kolonnalardyń irgetasyn nyǵaıtý boıynsha temirbeton jumystaryn, jańa metall konstrýktsııalaryn daıyndaý jáne ornatý jumystaryn júrgizedi.

Biz demeýshilerge osy mańyzdy jobanyń bir bóligi bolyp, áleýmettik jaýapkershilikti tanytqany úshin úlken alǵysymyzdy bildirgimiz keledi. Biz Bas botanıkalyq baqqa tropıktik jáne sýbtropıktik ósimdikterdiń kollektsııasyn saqtaýǵa baǵyttalǵan qoldaýdy joǵary baǵalaımyz, - dep habarlady baqtan.

Eske salaıyq, Kazinform agenttiginiń BIZDIÑ ORTA podkasynda Májilis depýtaty Murat Ergeshbaev kásipkerler áleýmettik jaýapkershilikke nazar aýdarýy kerek ekenin aıtty.