Demeýshilik kómektiń arqasynda astanalyq eki múgedek bala shetelde emdelip keledi

STANA. Shildeniń 27-si. QazAqparat /Janna Qorqytova/ - Demeýshilik kómektiń arqasynda astanalyq eki múgedek bala shetelge baryp emdele alatyn boldy. «Múgedek balalar qoǵamynyń» aıasynda uıymdastyrylǵan «Ǵajaıypty óz qolyńmen jasa» bastamashyl toby múmkindikteri shekteýli balalardy qoldaýǵa baǵyttalǵan osy attas áleýmettik jobasyn qorytyndylady. Bul týraly QazAqparat tilshisine toptyń eriktileri habarlady.

Aǵymdaǵy jyly naýryzdyń 19-ynda bastalyp, 4 aıǵa sozylǵan jobanyń maqsaty - shuǵyl operatsııalarǵa muqtaj múgedek balalardyń emdelýine qarajat jınaý bolatyn.

Demeýshilerdiń kómeginiń arqasynda jınalǵan soma 170 myń AQSh dollaryn qurap otyr. Balalarǵa jeke tulǵalarmen qatar, «Samuryq-Qazyna» Ulttyq ál-aýqat qory jáne «Edem-Qurylys» qurylys kompanııasy kómek kórsetti. Birinshi kezekte turǵan operatsııalardyń jalpy quny 60 myń AQSh dollaryn quraıdy.

Bastamashyl toptyń ókilderi keshe múgedek balalardyń ata-analaryna chekter tabys etti. 9 jastaǵy Ramazan Esmaǵambetovke 4,5 mıllıon teńge somanyń chegi berildi. Ramazan 2-3 jylǵa sozylatyn, keıinnen Máskeýde oqtyn-oqtyn tekserilýdi qajet etetin uzaq em-domǵa muqtaj. Ol emdelýge tamyz aıynda attanady.

Osynaý joba aıasynda, 14 jastaǵy Aıdos Sanaqbaevtyń ata-anasyna 5,2 mıllıon teńge bólinip otyr. Aıdos qazir Germanııada emdelip jatyr.