Qaıda júrse de aman bolsyn: Demeý Jadyraevtyń anasy kózine jas aldy

ÚShARAL. KAZINFORM — Jetisý oblysy Alakól aýdanynyń ortalyǵy Úsharalda búkil aýyl dalada úlken ekran aldyna jınaldy. Búgin túnde osy eldiń týmasy Demeý Jadyraev Parıj Olımpıadasy fınalynda japon sportshysy Nao Kýsakamen beldesti. 

Jınalǵandar arasynda Demeýdiń anasy Kúlıpa Bıjanova jáne qazaqstandyq grek-rım kúresi palýany, 2008 jylǵy Beıjiń Olımpıadasynyń kúmis júldegeri, eki dúrkin Azııa chempıony Nurbaqyt Teńizbaev bar. 

«Demeýdiń kúmisine qýanyshtymyz. Altyn medal bolady degen úmitpen bárimiz qoldaý kórsettik. Degenmen, munyń ózi úlken jetistik. Demeý bar kúsh-jigerin salyp, qolynan kelgenin jasady. Qazaq eline úlken qýanysh syılady», — deıdi Nurbaqyt Teńizbaev. 

Beldesýden keıin kópshilik Demeýdiń anasyn quttyqtap, jyly lebizin bildirdi. 

«Qýanyshtymyn. Qaıda júrse de deni saý bolsyn balamnyń. Іzin jalǵaıtyn inileri sońynan ere bersin», — dedi anasy kózine jas alyp. 

Eske sala keteıik, búgin Demeý Jadyraev fınalda japon sportshysy Nao Kýsakamen beldesip, Parıj Olımpıadasynyń kúmis júldesin jeńip alǵan bolatyn.