Demeý Jadyraev pen Nazym Qyzaıbaıǵa 3 bólmeli páter berildi
QONAEV. KAZINFORM – Qonaev qalasynyń ortalyq alańynda Parıjde ótken jazǵy Olımpıada oıyndarynyń júldegerleri Demeý Jadyraev pen Nazym Qyzaıbaı marapattaldy. Saltanatty rásimge Almaty oblysynyń ákimi Marat Sultanǵazıev qatysty.
Almaty oblysynyń ákimdigi Parıj Olımpıadasynyń kúmis júldegeri Demeý Jadyraevqa úsh bólmeli páter men 10 mıllıon teńgeniń sertıfıkatyn tabystady.
Demeý Jadyraevtyń alǵashqy bapkeri Jumahan Turǵanbekovke jáne sportshynyń jeke bapkeri Boranbek Qońyratovqa 2 bólmeli páter men 2 mıllıon teńgeniń sertıfıkaty syılandy.
Al Parıj Olımpıadasynyń qola júldegeri Nazym Qyzaıbaıǵa demeýshiler atynan 3 bólmeli páter men 2 mıllıon teńge syılyqqa berildi. Sondaı-aq Parıj Olımpıadasyna Almaty oblysynyń atynan qatysqan Ásem Orynbaı, Edýard Eşenkoǵa 2 mıllıon teńge qarjylaı syılyq berildi.
Eske salaıyq, 7 tamyz kúni Demeý Jadyraev Parıj Olımpıadasynyń kúmis júldegeri atandy.
Dál osy kúni Nazym Qyzaıbaı Olımpıadanyń qola júldesin jeńip aldy.
