Demalysta júrgen patrýldik polıtseı qyzmetkeri qarýly buzaqyny zalalsyzdandyrdy
ALMATY. 14 qyrkúıek. QazAqparat /Názıra Eleýhan/ - Almatyda demalysta júrgen patrýldik polıtseı qyzmetkeri qarýly buzaqyny zalalsyzdandyrdy, dep habarlaıdy Almaty qalasynyń ІІD-niń baspasóz qyzmeti.
Oqıǵa Almatynyń Medeý aýdanynda oryn alǵan. Keshki saǵat bester shamasynda Raıymbek dańǵylynyń boıynda demalys kezinde serýendep júrgen patrýldik polıtsııa polkiniń qyzmetkeri, polıtsııa aǵa serjanty Janǵalı Jamalbekov eki er adam arasyndaǵy qaqtyǵysqa nazar aýdarady. Tártip saqshysy tóbelesip jatqandardyń janyna baryp, jaǵdaıdyń anyq-qanyǵyn uǵynýdy óziniń kásibı jáne azamattyq boryshy dep sanaǵan.
«Bizdiń qyzmetker qyzmetten tys bolǵan soń kúndelikti qarapaıym kıimde bolǵan. Jaqynyraq barǵan ol bir er adamnyń ekinshisin qatygezdikpen uryp jatqanyn kóredi. Polıtseı pyshaqpen qarýlanǵan buzaqyny ustaýǵa shara qoldanady. Alaıda, arpalys kezinde aǵa serjant Jamalbekov oń ıyǵynan pyshaq jaraqatyn alady. Biraq, ol óziniń kóp qan joǵaltqanyna da qaramastan qylmyskerdi qarýsyzdandyryp, ony qolǵa túsiredi. Áriptesine kómekke dál ýaqytynda kelip jetken jol polıtsııasynyń qyzmetkerleri oqıǵa bolǵan jerge «jedel járdem» shaqyrǵan»,- dep málim etti Almaty qalasynyń ІІD patrýldik polıtsııa polki komandıriniń orynbasary, polıtsııa podpolkovnıgi Qýanysh Ábdirahmanov.
Bárinen buryn dárigerlerdiń kómegine taıaq jegen júrginshi muqtaj boldy. Ol taıaý mańdaǵy aýrýhanalarynyń birine jetkizildi. Al jedel-tergeý tobyn kútýge qalǵan polıtseıge dárigerler tikeleı oqıǵa bolǵan jerde alǵashqy medıtsınalyq járdem kórsetken.
«Quryqtaý kezinde belsendi qarsylyq kórsetken sotqar Jambyl oblysy Merke aýdanynyń 27-jasar turǵyny bolyp shyqty. Narkologııalyq saraptama nátıjesi onyń ortasha dárejedegi alkogoldi masańdyqta bolǵandyǵyn anyqtady. Biraz spırtti ishimdik ishken eki tanys arasynda janjal týyp, nátıjesinde bireýi ekinshisine pyshaqpen tarpa bas salǵany keıinirek anyqtaldy. Bir qýanarlyǵy, janynan ótip bara jatqan bizdiń qyzmetker týyndaǵan jaǵdaıǵa nemquraılyqpen qaramaı, óz densaýlyǵynyń qunymen qylmyskerdi zalalsyzdandyryp, sonymen qatar óziniń qyzmettik paryzyn abyroımen oryndady. Tártip saqshysy bul oqıǵaǵa aralaspaǵanda, bul dóreki janjaldyń arty qanshama qaıǵyly jaǵdaıǵa aparatynyn oılaýdyń ózi qorqynyshty»,- dep óz sózin tujyrymdady Qýanysh Ábdirahmanov.
