Demalys kúnderi jolda qalyp qoıǵan 77 adam qar qursaýynan qutqaryldy
Demalys kúnderi Shyǵys Qazaqstan, Jambyl, Qostanaı jáne Túrkistan oblystarynda oblystyq jáne respýblıkalyq mańyzy bar avtojoldarda qar qursaýynan 77 adam , onyń ishinde 4 bala qutqarylyp, 59 tehnıka shyǵaryldy. Bul týraly QR TJM resmı ókili Talǵat Ýálı habarlady.
6 aqpanda Sozaq aýdany Sholaqqorǵan aýylynan 135 shaqyrym jerde «Ulanbel-Sozaq-Ekpindi» oblystyq mańyzy bar avtojolynyń jabyq ýchaskesiniń 577-642 shaqyrymynda jolaýshylary bar 53 avtokólik qar qursaýynda qaldy.
Túrkistan oblysy TJ departamentiniń qutqarýshylary 53 avtokólikti qar qursaýynan shyǵaryp, 23 adamdy Jartytóbe aýylyndaǵy Tastemirsaı jylytý beketine jetkizdi.
Esterińizge sala keteıik, saǵat 20.16-dan bastap Sozaq aýdanynda aýa raıynyń qolaısyzdyǵyna baılanysty ShQ-2 «Ulanbel-Sozaq-Ekpindi» oblystyq mańyzy bar avtojoldyń 577-642 shaqyrymynda jol jabylǵan bolatyn.
Jambyl oblysy TJD qutqarýshylary Jýaly aýdany «Almaty-Tashkent» avtojolynyń 587-593 shaqyrymynda avtojoldyń jabyq ýchaskesinde toqtap qalǵan avtokólikterden 19 adamdy, onyń ishinde 4 balany Shaqpaq ata men Momyshuly aýyldarynyń jylytý pýnkterine jetkizdi.
Saǵat 20.47-de Sarysý aýdanynyń Jańatas qalasynan 20 shaqyrym jerde jol boıynda isten shyqqan jeńil avtokóliktiń 6 jolaýshysy Jańatas qalasyna jetkizildi.
Tarbaǵataı aýdanynda Aqsýat aýylynan 33 shaqyrym jerde úsh jolaýshysy bar Nıva avtokóligi qar qursaýynda qaldy.
Oqıǵa ornyna arnaıy tehnıkamen kelgen Shyǵys Qazaqstan oblysy TJD qutqarýshylary avtokólikti joldyń tazartylǵan ýchaskesine shyǵardy. Avtokólik óz baǵytymen jolyn jalǵastyrdy.
Saǵat 03.45-te Amangeldi aýdanynyń Kemer aýylynan 5 shaqyrym jerde jol boıynda Qostanaı oblysy TJD qutqarýshylary tazartylǵan ýchaskege 4 jeńil kólikti shyǵaryp, eldi mekenge deıin jetkizip saldy. Kólikte 20 jolaýshy bolǵan.
Saǵat 13.00-de Qamysty aýdanynyń Svobodnoe aýyly mańynda Qostanaı oblysy TJD qutqarýshylary isten shyqqan jeńil avtokólikte bolǵan 6 adam, onyń ishinde júkti áıel eldi mekenge jetkizildi. Aýyldy okrýg ákimdigi qutqarylǵandarǵa ystyq tamaq berip, kólikterin janar-jaǵarmaımen toltyrdy.
Qutqarylǵandar medıtsınalyq kómekke muqtaj bolǵan joq. Avarııalyq-qutqarý operatsııalaryna 27 qutqarýshy men 7 tehnıka jumyldyryldy.
TJM azamattarǵa eldi mekennen shyqqan kezde qaýipsizdik erejelerin saqtaýǵa keńes beredi.
«Alys jolǵa shyǵar aldynda aýa raıy boljamymen tanysyp, avtokóliktiń tehnıkalyq jaı-kúıiniń durystyǵyna kóz jetkizgen abzal. Ózińizben birge qysyltaıań jaǵdaıda kómektesetin barlyq qajetti zattardy alyp júrińiz. «Dármen» mobıldi qosymshasy joldardyń jabylýy jáne daýyldy eskertý týraly habardar bolýǵa múmkindik beredi» dep eskertedi mınıstrlik.
Qutqarý qyzmetiniń biryńǵaı telefony - 112.
