Demalys kúnderi toı ótkizgen petropavldyqtar aıyppul tóleıdi
PETROPAVL. QazAqparat – Soltústik Qazaqstan oblysynda demalys kúnderi eki meıramhanada toı ótkizilgen, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, demalys kúnderi Petropavldaǵy «Emırat» jáne «Sozvezdıe» meıramhanalarynda toı ótken. Onda 100-den astam adam jınalǵan. Bul – karantın talabyn buzý bolyp esepteledi. Oblystyń bas sanıtarııalyq dárigeriniń qaýlysyna sáıkes adam kóp jınalatyn is-sharalardy ótkizýge tyıym salynǵan.
Toıdyń ústinen túsken ýchaskelik ınspektorlar hattama toltyryp, ákimshilik shara qoldaný úshin ony SQO taýarlar men kórsetiletin qyzmetterdiń sapasy men qaýipsizdigin baqylaý departamentine jiberdi.
«Іs-sharany uıymdastyrýshylar jaýapkershilikti túsinbeıdi. Biz halyq kóp jınalǵan oıyn-toıdy toqtatyp, qonaqtardy taratamyz. Óıtkeni qaýipti aýrý toıǵa kelgenderge, olarǵa qyzmet kórsetip júrgenderge juǵýy múmkin. Endi meıramhana ıeleri de, toıdy uıymdastyrýshylar da aıyppul tóleıdi», - deıdi Petropavl qalalyq polıtsııa basqarmasy bastyǵynyń birinshi orynbasary Álibek Ǵabdýllın.
Demalys kúnderi sondaı-aq túngi saǵat 00.00-den keıin eki saýna jumys istegen. Jalpy SQO-da qyrkúıek aıynda karantın talabyn buzýdyń 99 deregi anyqtaldy.
