Demalys kúnderi Qazaqstannyń soltústiginde jańbyr jaýyp, sońy qarǵa ulasady
ASTANA. QazAqparat - Sınoptıkter 21-23 qazan kúnderi Qazaqstannyń soltústiginde jańbyr jaýyp, sońy qarǵa ulasady dep boljaýda.
«Qýatty atmosferalyq aǵynnyń Qazaqstannyń soltústik jartysy arqyly qozǵalýy demalys kúnderi jaýyn-shashynǵa sebep bolady, jaýǵan jańbyrdyń sońy qarǵa ulasýy múmkin. Keı óńirlerde batystan kúshti jel soǵatyny kútilýde», - delingen «Qazgıdromet» RMK habarlamasynda.
Reseıdiń eýropalyq bóliginiń ortalyq aýdandarynda jańa tsıklon túzilip jatyr, ol jeksenbi kúni Qazaqstannyń batys oblystaryna, al dúısenbide ortalyq jáne soltústik óńirlerge jetedi.
Osyǵan oraı sýyq tsıklon, jaýyn-shashyn bolady degen boljam jasaıdy sınoptıkter. Ońtústik jáne ońtústik-shyǵys aımaqtarda joǵary atmosferalyq qysymnyń áserinen demalys kúnderi jyly aýa raıy saqtalady, kóp jerlerde jaýyn-shashyn bolmaıdy.
