Demalys kúnderi Qazaqstanda aýa temperatýrasy sál tómendeıdi
ASTANA. QazAqparat - Qazaqstanda tsıklondy antıtsıklon almastyrady, alaıda qatty aıaz bolmaıdy, dep habarlady «Qazgıdromet» RMK 12-14 jeltoqsanǵa jasaǵan aýa raıy boljamynda.
Atlantıkalyq tsıklondar Reseıdiń Eýropalyq bóligi men Batys Sibir arqyly bir-birin almastyryp jatyr. Osylaısha arktıkalyq massalardyń Reseıge ǵana emes, sonymen birge Qazaqstan aýmaǵyna ótýine kedergi keltirip otyr. Sóıtip, ótken táılikte aýa temperatýrasy respýblıkada normadan 1-5º joǵary, soltústik jáne shyǵys oblystarynda 6-13º joǵary boldy.
Demalys kúnderi Qazaqstandaǵy aýa raıyna Shyǵys Eýropadan kelgen antıtsıklon áser etedi. Sondyqtan respýblıkanyń basym oblystarynda senbi kúni soltústik, ortalyq jáne shyǵys aýdandarynda keı jerlerde azdap qar jaýady. Aýa temperatýrasy tómendeıdi, alaıda klımattyq normadan 2-5º joǵary bolyp qalady.
