Demalys kúnderi elordada eki oblystyń jármeńkesi ótedi
NUR-SULTAN. QazAqparat - 5 jáne 6 qyrkúıek kúnderi elordaǵa eki oblystyń fermerleri 800 tonnadan astam aýylsharýashylyq ónimin ákeledi, dep habarlaıdy QazAqparat qala ákimdigine silteme jasap.
5-6 qyrkúıek kúnderi «Han Shatyr» saýda oıyn-saýyq ortalyǵynyń janynda Túrkistan jáne Almaty oblystary ákimdiginiń uıymdastyrýymen aýyl sharýashylyǵy ónimderiniń jármeńkesi ótkiziledi.
5 jáne 6 qyrkúıekte Almaty oblysynan aýyl sharýashylyǵy ónimderi jármeńkesine úsh qala – Tekeli, Qapshaǵaı jáne Taldyqorǵan qalalary jáne 17 aýdan qatysady.
Jalpy alǵanda, 370,4 tonna aýyl sharýashylyǵy ónimi nemese 48 ataýly ónim ákelinedi. Fermerler 44,5 tonna et, 16,1 tonna sút ónimin, 113,6 tonna kókónis, 14,7 tonna balyq, 38 tonna jemis-jıdek, 42,6 tonna kartop, 100 tonna basqa da ónimder ákeledi. Jalpy somasy 170,5 mln teńgeniń ónimin satý josparlanyp otyr.
Jármeńkede Túrkistan oblysy sharýalary 447,2 tonna aýyl sharýashylyǵy ónimin 15-20 paıyzǵa tómen baǵamen usynady.
Atap aıtqanda, 34 júk kóligine tıelgen 267,7 tonna kókónis, baqsha, kartop, 29,5 tonna jemis-jıdek, 72 tonna et jáne et ónimderi, 47,5 tonna sút ónimderi, 10 tonna balyq, 6 tonna bal, 14,5 tonna jemis shyryny men konservi ónimderi.
Túrkistan ákimdigi negizgi ónimder boıynsha baǵalarǵa da taldaý jasaǵan. Máselen, Nur-Sultan qalasynda sıyr etiniń ortasha baǵasy 2000 – 2100 tg/kg bolsa, jármeńkede 1700-1800 teńgeden, qarbyz, qaýyn 130-200 tg/kg bolsa, jármeńkede 75-100 tg/kg, kókónistiń ortasha baǵasy 150-200 tg/kg bolsa, jármeńkede 100-150 teńgeden satylady.
Jármeńkege kelýshiler qatań sanıtarlyq-gıgıenalyq talaptardy saqtaý qajet. Maska taǵý, qashyqtyqty saqtaý jáne mindetti túrde antıseptıki qoldanýy tıis.
