Demalys kúnderi elordada 20 karantın buzý jaǵdaıy tirkeldi
NUR-SULTAN. QazAqparat – Elordada karantın rejımin buzǵandardy anyqtap, jaýapqa tartý jalǵasyp keledi, dep habarlaıdy QazAqparat qalalyq Polıtsııa departamentine silteme jasap.
«Birqatar aldyn-alý sharasy kórsetilgen qoldanystaǵy qaýlyǵa qaramastan, qala turǵyndary áli de oıyn-saýyq nysandaryna, kompıýter klýbyna barýdan, dostarmen bas qosýdan tartynar emes. Beıqam turǵyndar sanıtarlyq talaptardy elemeı, ózgelerge qaýip tóndirýde. Taýarlar men qyzmetterdiń sapasy men qaýipsizdigin baqylaý basqarmasy, ákimdik qyzmetkerleri, eriktiler men polıtsııa qyzmetkerlerinen quralǵan mobıldi top kún saıyn karantın rejıminiń saqtalýy boıynsha reıd ótkizip jatyr», - dep habarlady elordalyq Polıtsııa departamentiniń baspasóz qyzmeti.
Salynǵan tyıymǵa qaramastan keshe saǵat 23.20-da «Zarechnyı» monshasyn tekserý kezinde 25 kelýshiniń demalyp jatqany anyqtaldy.
Sondaı-aq, reıd barysynda monıtorıng toby saǵat 01.00-de kelýshilerge qyzmet etip, sanıtarlyq normalardy buzǵan «OpusOne» karaoke meıramhanasyn áshkereledi.
«Karantın rejımin tek oıyn-saýyq mekemeleri ǵana buzbaıdy. Túngi reıd barysynda mobıldi top tyıym salynǵan ýaqytta jumys istegen kompıýter klýbtary men dúkenderdi anyqtady. Demalys kúnderi polıtsııa departamentiniń aýmaqtyq bólimsheleriniń qyzmetkerleri Taýarlar men qyzmetterdiń sapasy men qaýipsizdigin baqylaý basqarmasymen birlesip, 107 kásipkerlik nysanyn tekserdi jáne 20 karantın buzý jaǵdaıyn tirkedi. Barlyq materıal QR Ákimshilik quqyq buzýshylyq týraly kodeksiniń 425-babymen ákimshilik jaýapqa tartý úshin Taýarlar men qyzmetterdiń sapasy men qaýipsizdigin baqylaý basqarmasyna joldandy», - deıdi departament.
Nur-Sultan qalasynyń polıtsııa departamenti zań buzǵandardyń qoldanystaǵy zańnamaǵa sáıkes jaýapqa tartylatynyn eskertedi.
