Demalys kúnderi elimizdiń soltústik oblystarynda úsik júrgeni tirkeldi
ASTANA. QazAqparat - Demalys kúnderi respýblıkamyzdyń kóptegen aýmaqtarynda kúzdiń salqyn kúnderindeı aýa raıy boldy. Soltústik oblystardyń keıbir aýdandarynda úsik júrgeni tirkeldi, dep habarlaıdy «Qazgıdromet».
25-27 tamyz aralyǵynda ońtústikte jáne ońtústik-shyǵysta jańbyr jaýyp, keı jerlerde nóser bolady, aýa temperatýrasy salqyndaıdy. Eger ótken aptada Qazaqstandaǵy aýa raıynyń temperatýrasy kópjyldyq kórsetkishten 3-10º joǵary bolsa, osy demalys kúnderi ol kórsetkishter 3-5º tómendedi.
Aldaǵy úsh kúnde Oral men Batys-Sibir aýmaqtarynan yǵysyp kelgen sýyq atmosferalyq fronttardyń áserinen, elimizdiń barlyq derlik aýmaqtarynda jańbyr jaýyp, naızaǵaı oınap, 13-20 m/s ekpindi jel soǵady, aýa temperatýrasy sol mezgilderde klımattyq ólshem boıynsha 3-6º tómen kúıinde saqtalady.
