Demalys kúnderi elimizdiń basym bóliginde jaýyn jaýady - Qazgıdromet
NUR-SULTAN. QazAqparat – «Qazgıdromet» RMK dırektory Danara Álimbaeva aldaǵy demalys kúnderi aýa raıy qandaı bolatynyna qatysty boljamymen bólisti, dep habarlaıdy QazAqparat tilshisi.
«Aldaǵy 24-26 shildedegi demalys kúnderiniń aýa raıyna keler bolsaq, Qazaqstan aýmaǵynyń basym bóliginde ylǵaldy jáne salystyrmaly túrde salqyn aýa massasyn ákeletin antıtsıklon qalyptasady. Turaqsyz aýa raıy kútilýde. Elimizdiń soltústik jáne shyǵys óńirlerinde kún kúrkirep, daýyldy jel men qatty jańbyr kútiledi. Burshaq túsýi de yqtımal. Tek respýblıkanyń batys aımaqtarynda kún ashyq bolady», - dedi Danara Álimbaeva OKQ-da ótken baspasóz máslıhatynda.
Onyń aıtýynsha aýa raıy ońtústik jáne ońtústik shyǵysta 30-39 gradýs, Mańǵystaý oblysynyń ońtústiginde 43 gradýske deıin ystyq aýa raıy saqtalady. Qazaqstannyń shyǵysynda 25-30 gradýs, ońtústik 33 gradýsqa deıin barady. Respýblıkanyń batysy men soltústiginde ystyq azdap basylady. Batysta 22-31 gradýs aralyǵynda, soltústik jartysynda aýa raıy 20-25 gradýs bolyp, salqyndaıdy.
«Aldaǵy kúnderde elordada jańbyr kútilýde. 24-25 shildede keıde kún kúrkirep, kúshi 15-20 m/s bolatyn jel men qatty jańbyr bolatyny boljanady. Burshaq jaýýy da yqtımal. Aýa temperatýrasy túnde 16-18 gradýstan 12-14 gradýsqa deıin, kúndiz 22-24 gradýstan 20-22 gradýsqa tómendeýi boljanady. Almatyda naızaǵaı oınap, ótkinshi jańbyr jaýady. Naızaǵaı bolǵan kezde jeldiń sekýndyna 12 metrge deıin kúsheıetini kútiledi. 26 shildede aýa raıy jaýyn-shashynsyz bolady», - dedi ol.
