Demalys kúnderi birneshe oblysta daýyl turýy múmkin
ASTANA. QazAqparat - Demalys kúnderi birneshe oblysta daýyl týraly eskertý jarııalandy, dep habarlaıdy QazAqparat tilshisi Qazgıdrometke silteme jasap.
Boljamǵa sáıkes, 26-27 mamyrda Aqmola oblysynda ońtústik-batystan soqqan jel soltústik-shyǵysqa aýysady. Túnde keı jerde 15-20 m/s, kúndiz óńirdiń basym bóliginde 15-20 m/s jyldamdyqpen jel soqsa, keı jerde jel ekpini 23-28 m/s-ǵa deıin barýy yqtımal. Keıbir jerde naızaǵaı oınap, daýyl turyp, burshaq jaýýy múmkin ekeni eskertilip otyr.
«27 mamyrda kúndiz Aqmola oblysynyń keı jerinde qatty jańbyr jaýady. Al Astana qalasynda 26 mamyrda kúndiz, 27 mamyrda táýlik boıy oqtyn-oqtynda naızaǵaı oınaıdy. Burshaq jaýýy yqtımal. Ońtústik-batystan soqqan jel soltústik-shyǵysqa aýysyp, jel ekpini 15-20 m/s deńgeıde bolsa, 26-27 mamyrda jel ekpini 25 m/s-qa deıin bolýy múmkin», - delingen habarlamada.
Sınoptıkterdiń boljaýynsha, 26 mamyrda Qostanaı oblysynyń keı jerinde tuman, naızaǵaı, daýyl, burshaq kútiledi. Soltústik-batystan soqqan jel soltústik-shyǵysqa aýysyp, aımaqtyń basym bóliginde 15-20 m/s, kúndiz keı jerde 23-28 m/s jel kútiledi. Al 26 mamyrda Soltústik Qazaqstan oblysy boıynsha soltústik-shyǵystan soǵatyn jeldiń kúshi 15-20, keı jerde 23-28 m/s deıin údeýi kútiledi. Jańbyr jaýyp, keı jerde naızaǵaı oınap, daýyl turyp, burshaq jaýýy múmkin.
«Petropavlda 26 mamyrda soltústik-shyǵystan soǵatyn jeldiń kúshi 15-20 m/s, keı jerde ekpini 23-28 m/s bolatyn jel kútiledi. Jańbyr jaýyp, naızaǵaı, daýyl, burshaq bolýy yqtımal», - dep boljaıdy sınoptıkter.
Al Aqtóbe oblysynda erteń ońtústik-batystan soqqan jel soltústik-shyǵysqa aýysyp, keı jerde 17-22 m/s jel soǵýy múmkin. Aqtóbede 26 mamyrda kúndiz naızaǵaı kútiledi. Ońtústik-batystan soqqan jel soltústik-shyǵysqa aýysady. Dabyldy eskertýdiń yqtımaldylyǵy - 90-95%.
«26 mamyrda Qyzylorda oblysynda shyǵystan soqqan jel ońtústik-batysqa aýysady. Kúnniń ekinshi jartysynda keı jerde 15-20 m/s, keı jerde ekpini 23 m/s jel soǵyp, naızaǵaı, shańdy daýyl, burshaq bolýy múmkin. Dabyldy eskertýdiń yqtımaldylyǵy 90-95 %», - delingen habarlamada.
