Demalys kúnderi astanada Almaty men Jetisý oblystarynyń jármeńkesi ótedi
Bul joly óz ónimin Almaty jáne Jetisý oblystarynyń taýar óndirýshileri usynady.
Eki óńirdiń taýar óndirýshileri elordaǵa 459 tonna ónim ákeledi, onyń ishinde: 84 tonna – kókónis, 62 tonna – jemis-jıdek, 48,7 tonna – kartop, 41,5 tonna – et, 9 tonnadan astam – sút ónimderi, 8 tonna – balyq, 500 kg bal, sondaı-aq 189 tonna ózge de ónimder bar.
Máselen, Jetisý oblysy 54 taýar túrin, Almaty oblysy 42 túrin usynady. Olardyń arasynda ósimdik maıy, qant, un, jarma, ulttyq sýsyndar jáne basqalar bar.
Sonymen qatar elorda turǵyndary men qonaqtary úshin kontserttik baǵdarlama daıyndalǵan.
Málim etilgendeı, aýylsharýashylyq taýaryn óndirýshiler jármeńkege óz ónimin deldalsyz alyp keletindikten baǵalar naryqtan 10-20% tómen bolady.
Aıta keteıik, jármeńkeler ár senbi jáne jeksenbi kúnderi 13 qarashaǵa deıin «Astana-Arena» stadıony janyndaǵy alańda ótedi.
Kelesi demalys kúnderi, ıaǵnı 24-25 qyrkúıekte Batys Qazaqstan jáne Atyraý oblystarynyń kásipkerleri óz ónimin usynady.