Demalys kúnderi Astanada alǵash ret dýatlonnan jarys ótedi - VIDEO
ASTANA. QazAqparat - Qazaqstan Respýblıkasy Konstıtýtsııasynyń 20 jyldyǵyn merekeleýge oraı qala ákimdigi elordada alǵash ret «Astana-dýatlon 2015» jarysyn ótkizedi, dep habarlaıdy qalalyq ákimdiktiń baspasóz qyzmeti.
Qatysýshylar velosıpedpen 15 shaqyrym qashyqtyqty baǵyndyryp, jartylaı marafonda 5 shaqyrymǵa júgiredi. Joldyń jalpy uzyndyǵy mereıtoılyq dataǵa oraılastyrylǵan.
Sporttyq shara 29 tamyzda saǵat 10:00-de «Báıterek» monýmentiniń aldyndaǵy alańnan bastalady. Aıta keteıik, árbir qatysýshynyń ýaqyty tirkeý kezinde beriletin derbes chıptiń kómegimen jeke belgilenetin bolady.
Tirkeý sóreniń janyndaǵy aýmaqta saǵat 7:00-den 9:30 deıin ótedi. Árbir qatysýshy jarys bastalmas buryn arnaıy ornatylǵan pýnktterde medıtsınalyq tekserýden ótedi. Budan basqa, velosıpedterge tegin qyzmet kórsetý de qarastyrylǵan.
Demalys kúnderi elordada ótetin dýatlon jarysynda júldeli oryndar erler men áıelder arasynda úsh jas sanaty boıynsha anyqtalatyn bolady. Jeńimpazdardyń eń jas sanaty 16-35 jas aralyǵynda, sondaı-aq ekinshi sanat 36-50 jas aralyǵynda jáne sońǵysy 51 jastan asqan sportshylar arasynda anyqtalady.
Bas júlde - bedeldi fıtness-klýbqa jyldyq abonement- «Astana-dýatlon 2015» absolıýtti chempıonyna tabystalady. Jarystyń eki kezeńin de eń az ýaqyt aralyǵynda baǵyndyrǵan sportshy jasy men jynysyna qaramastan absolıýtti chempıon atalady. Sonymen qatar, árbir dýatlet máreden keıin ótkiziletin lotereıa utysynda baǵyn synaıdy.
Jarysqa kez kelgen velosıpedpen qatysýǵa bolady. Sportshy mindetti túrde dýlyǵa kııýi kerek.
