Demalys kúnderi Astanada 1 399 adam Jol qozǵalysy erejesin buzǵan
ASTANA. 5 naýryz. QazAqparat - Ótken demalys kúnderi Astana qalasynyń jol polıtsııasy qyzmetkerleri Jol qozǵalysy erejesin buzǵan 1 399 adamdy anyqtady. Bul týraly astana.kz saıtyna qalalyq Jol polıtsııasy basqarmasynan málim etti.
«1 399 ereje buzý faktileriniń qatarynda jyldamdyqty arttyrý (142), joldyń qarsy baǵytyna shyǵyp ketý (30), jaıaý júrginshiler ótpesin kesip ótý (27), avtomobıl basqaryp otyryp, uıaly telefonmen sóılesý (106), jol ústine qoqys tastaý (209), qaýipsizdik beldigin taqpaý (139), sondaı-aq, jaıaý júrginshilerdiń jol qozǵalysy erejelerin saqtamaýy (160) bar», - delingen habarlamada.
Eske salaıyq, bıylǵy jyldyń 23 jáne 24 aqpany kúni jasalǵan osyndaı tekserýlerdiń nátıjesinde Astana qalasynyń jol polıtsııasy qyzmetkerleri 1 306 jol qozǵalysy erejesin buzýdy anyqtaǵan bolatyn.
Qalalyq Jol polıtsııasy qyzmetkerleri «Ákimshilik quqyq buzý týraly» QR Kodeksiniń 473 babyna sáıkes «Jaıaý júrginshiler jáne basqa da jol qozǵalysyna qatysýshylardyń qozǵalys erejesin buzýyna» 5 aılyq eseptik kórsetkish kóleminde (8 655 teńge) aıyppul salý qarastyrylǵanyn, júıeli túrde ereje buzýshylyq 15 aılyq eseptik kórsetkish kóleminde (25 965 tg) aıyppulmen nemese úsh táýlikke ákimshilik qamaýǵa alýǵa jazalanatynyn eskertedi.
