Demalys kúnderi Almatyda qandaı nysandar jumys istemeıdi
ALMATY. QazAqparat – Almaty qalasy taýarlar men qyzmetterdiń sapasy men qaýipsizdigin baqylaý departamentiniń bas mamany Gúlnara Mádımarova onlaın brıfıng barysynda demalys kúnderi engizilgen karantın sharalarynyń erejelerin túsindirdi, dep habarlaıdy QazAqparat tilshisi.
Onyń aıtýynsha, demalys kúnderi karantın sharalaryn qadaǵalaıtyn monıtorıngilik top jumys isteıdi.
«Demalys kúnderi turǵyndarǵa syrtqa shyǵýǵa ruqsat etiledi, saıabaqtarǵa, alańdarǵa, jaǵalaýǵa barýǵa bolady, biraq mindetti túrde maska taǵý qajet. Serýendeýge shyqqandardyń sany úsh adamnan aspaýy tıis. Sonymen qatar, áleýmettik qashyqtyqty saqtaý mańyzdy. Demalys kúnderi qoǵamdyq kóliktiń qozǵalysyna, 65 jastan asqan adamdardyń kóshege shyǵýyna, saýda, oıyn-saýyq ortalyqtary (ondaǵy azyq-túlik sýpermarketteri men dárihanalardy qospaǵanda), saýda úıleriniń, saýda jelileriniń jumysyna, sulýlyq salondary, shashtarazdar, SPA-ortalyqtary, kosmetologııalyq qyzmet kórsetetin nysandardyń jumysyna tyıym salynady»,– dedi Gúlnara Mádımarova.
Sonymen qatar, ol karantındik sharalardy saqtamaǵandar jaýapqa tartylatynyn atap ótti.
«Túngi klýbtar, kompıýterlik mekemeler, bılıard, túngi barlardyń jumysyna tyıym salynǵan. Eger olardyń jumys istegeni anyqtalsa, mekeme ıelerine QR Ákimshilik quqyq buzýshylyq týraly kodeksiniń 425-babynyń 1-bóligi boıynsha aıyppul salynady», - dep eskertti spıker.
