Demalys kúnderi Almatyda alty qylmysker ustaldy
ALMATY. 25 sáýir. QazAqparat /Ádilet Musahaev/ - Ótken demalys kúni Almaty tártip saqshylary 6 qylmyskerdi quryqtady, onyń úsheýi eldiń basqa aımaqtarynda qylmys jasaǵandar. Bul jaıynda Almaty qalasy ІІD-nyń baspasóz qyzmeti málim etti.
Ustalǵandardyń ishinde osydan jeti jyl buryn Shymkent qalasyndaǵy jeke kásipkerge qaraqshylyq shabýyl jasaǵan toptyń qatarynda bolǵan 26 jasar azamat ta bar.
"Shabýyl jasaǵannan keıin qylmysker eldiń ár qalasynda jasyrynyp, qashyp júrgen. Jaqynda ol Almatyǵa kelgen. Jumys tappaı biraz ýaqyt júrgen ol qaıyrshylardyń tobyna qosylyp, ishimdikke salynyp, ár jerde túnep júrgen. Kóp uzamaı bizdiń nazarymyzǵa ilinip, quryqtaldy", -deıdi Almaty qalasy ІІD-niń krımınaldy polıtsııa basqarmasy bastyǵynyń orynbasary Vadım Streltsov.
Osyndaı jaǵdaımen Qyrǵyzstannyń 38 jasar azamaty da ustaldy. Jambyl oblysynyń túzetý mekemesinde óz jazasyn ótep jatqan qylmysker, jaqynda ol jerden qashyp ketken. 1-shi sáýir kúni Jambyl oblysynyń polıtseıleri oǵan izdeý salyp, kóp uzamaı ol Almatydan ustalǵan.
"Ustalǵan ekeýi de izdeý salǵan óz aımaqtaryna jetkiziledi. Kórshi aımaqtardyń ІІD-niń birlese jumys isteýi qylmyskerlerge izdeý sharalaryn tıimdi júrgizýge kómektesedi. Osyndaı tájirıbege toly yntymaqtastyq TMD-nyń zań qorǵaýshy organ ókilderimen de jaqsy jolǵa qoıylǵan. Esterińizge sala ketsem, jaqynda Tomsk qalasyndaǵy áriptesterimiz 47 jasar erkektiń ólimine qatysty qylmyskerdi ustap berýge kómektesti", -dep atap ótti óz sózinde V.Streltsov.
