Demalys kúnderi 3 bala qaza taýyp, 5 bala aýrýhanaǵa tústi
NUR-SULTAN. QazAqparat – Tótenshe jaǵdaılar komıteti eresekterdiń qaraýynsyz qalǵan balalardyń jaǵdaıyna qatysty oqıǵalarǵa alańdaýshylyq bildirýde, dep habarlaıdy QazAqparat.
Sońǵy aılarda ata-analarynyń balalaryn dalada nemese úıde qaraýsyz qaldyrǵan soń oryn alǵan qaıǵyly jaǵdaılar sany kóbeıip ketken.
Ótken demalys kúnderi respýblıkada balalarǵa qatysty 7 qaıǵyly oqıǵa bolǵan, sonyń saldarynan úsh bala qaza taýyp, beseýi aýrýhanaǵa jetkizildi.
22 tamyz túninde elordanyń «Esil» aýdanyndaǵy «Prıgorodnoe» saıajaı qoǵamyndaǵy turǵyn úıde qatty otynmen janatyn peshtiń aqaýy, pesh murjasynyń tazartylmaýy saldarynan 2017 jáne 2012 jyly dúnıege kelgen eki bala ıis tıip, aýrýhanaǵa jetkizilgen.
22 tamyz kúni keshke Nur-Sultan qalasyndaǵy 14 qabatty kóppáterli turǵyn úıde eresekterdiń qaraýynsyz qalǵan 2016 jylǵy qyz bala tórtinshi qabat terezesinen qulap, jaraqat alyp, aýrýhanaǵa jetkizildi.
Sol kúni Almaty oblysynyń Alakól aýdanyndaǵy Aqshı aýylynda Alakólge shomylyp júrgen 2012 jylǵy balany gıdrotsıkl qaǵyp ketip, jaraqat alyp, aýrýhanaǵa jetkizildi.
22 tamyz kúni Pavlodar oblysynyń Baıanaýyl aýdanyndaǵy M.Júsip aýylyndaǵy jekemenshik turǵyn úıde jeńil kólik órtendi. Sonyń saldarynan kúıik shalǵan 2018 jylǵy qyz bala aýrýhana jetkizilip, sol jerde qaıtys boldy. Aldyn ala boljam boıynsha, órtke elektr symdarynyń tuıyqtalýy sebep bolǵan.
23 tamyzda Almaty qalasynyń Naýryzbaı aýdanyndaǵy jekemenshik turǵyn úıdiń aýlasynda 2010 jylǵy bala abaısyzda tereńdigi 4 metr jertólege túsip ketken. Ol aýrýhanaǵa jetkizildi.
23 tamyzda Batys Qazaqstan oblysy, Janǵaly aýdanynyń Jańaqazǵan kentindegi jekemenshik túrǵyn úıdiń aýlasynda úlkenderdiń qaraýynsyz qalǵan 2016 jylǵy qyz bala tereńdigi 2,5 metr ashyq turǵan qudyqqa qulap, batyp ketti.
Sol kúni Mańǵystaý oblysynyń Jańaózen qalasyndaǵy jekemenshik turǵyn úıdiń aýlasynda eresekterdiń qaraýynsyz qalǵan 2012 jylǵy bala qoldan jasalǵan átkenshek teýip júrip qaza tapty.
QR ІІM Tótenshe jaǵdaılar komıteti ata-analardy balalaryn qaraýsyz qaldyrmaı, qarapaıym qaýipsizdik erejelerin saqtaýyn suraıdy.
