Demalys kúndergi jumys: 200-den astam atyraýlyq memqyzmetshiden shaǵym túsken

ATYRAÝ. QazAqparat – Atyraý oblysynda jyl basynan beri 200-den astam memlekettik qyzmetshi memlekettik eńbek ınspektsııasyna shaǵymdanǵan, dep habarlaıdy QazAqparat.

Memlekettik qyzmet isteri agenttigi Atyraý oblysy boıynsha departamentiniń basshysy Erlan Ermahanbetovtiń málimetinshe, «E-qyzmet» júıesimen memlekettik organdardyń qoljetimdiligin baqylaýdy ıntegratsııalaý jospary bekitilgen.

«Qazirgi ýaqytta Atyraý oblysynda memlekettik organdardyń qoljetimdiligin baqylaý jáne basqarý júıesin «E-qyzmet» aqparattyq júıesine qosý boıynsha jumystar júrgizilýde. Mundaı is-shara memlekettik qyzmetshilerdiń quqyqtaryn qorǵaýǵa, ıkemdi jumys kestesin qurýǵa, onyń ishinde jumys kúni aıaqtalǵannan keıin memlekettik qyzmetshilerdiń jumys ornyndaǵy kidirisin, qyzmetshilerdiń demalys kúnderi jumysqa shyǵý praktıkasyn toqtatýǵa baǵyttalatyn bolady», - deıdi Erlan Ermahanbetov.

Onyń deregine súıensek, jyl basynan beri oblystyq memlekettik eńbek ınspektsııasy basqarmasyna 200-den asa aryz-shaǵym kelip túsken. Soǵan baılanysty 167 mekeme tekserilip, tıisti sharalar qabyldanǵan.

Departamentke túsken aryz negizinde Atyraý aýyldyq okrýgi ákiminiń mindetin atqarýshy bas mamandy demalys kúni negizsiz jumysqa shaqyrǵany anyqtaldy. Nátıjesinde bas mamanǵa demalys berý týraly buıryq shyǵarylyp, quqyǵy qalpyna keltirilgen. Al zań buzýshylyqqa jol bergen laýazymdy tulǵaǵa tártiptik shara qoldanyldy.

«Memlekettik qyzmet týraly jáne eńbek zańnamasynyń talaptary negizinde jumystan tys shuǵyl isteletin, demalys jáne mereke kúnderi jumystarǵa shaqyrylatyn memlekettik qyzmetshilerdiń jazbasha kelisimderi bolýy qajet. Endi osyndaı keleńsizdikti boldyrmaý úshin departament pen oblystyq memlekettik eńbek ınspektsııasy basqarmasy arasynda ózara yntymaqtastyq týraly memorandýmǵa qol qoıyldy», - dep málim etti Erlan Ermahanbetov.

Eske sala ketelik, budan buryn Atyraýda memlekettik qyzmet isteri departamentine basshy taǵaıyndalǵanyn jazǵan bolatynbyz.