Demalys alǵan balaly qyzmetkerlerden anyqtamanyń talap etilýi zańdy - mınıstr

NUR-SULTAN. QazAqparat – QR Eńbek jáne halyqty áleýmettik qorǵaý mınıstri Birjan Nurymbetov balamen úıde otyrýǵa májbúr jumysshylarǵa demalys berý tártibin túsindirdi, dep habarlaıdy QazAqparat tilshisi.

«Prezıdent jumys berýshilerge balamen úıde otyrýǵa májbúr ata-analarǵa aqyly demalys berýdi tapsyrǵan edi. Bul jumys qalaı iske asady? Eńbek kodeksi boıynsha, elimizdegi kez kelgen jumys istep júrgen azamat jylyna bir ret aqyly eńbek demalysyna shyǵa alady. Ol úshin ár mekemede keste jasalady, sol kestege sáıkes demalys beriledi. Bul jaǵdaıda jumys berýshilerge jyl saıynǵy eńbek demalysyn balamen otyrýǵa májbúr bolǵan ata-analarǵa osy kúnderi berýdi suraımyz» - dedi mınıstr Ortalyq kommýnıkatsııalar qyzmetinde ótken brıfıngte.

Bul rette jumysshyǵa keminde ortasha jalaqy tólenetin bolady.

«Óz kezeginde jumys berýshi jumysshydan úıdegi ózge otbasy músheleriniń demalysqa shyqpaǵany týraly ıa bolmasa januıada jumyssyz adamnyń joq ekendigi týraly anyqtama talap etýge quqyly», - dedi B. Nurymbetov.

Aıta keteıik, 13 naýryzda Prezıdent jedel áreket etý shtabynyń otyrysynda balasymen úıde otyrýǵa májbúr ata-analardy aqyly eńbek demalysyna jiberýdi tapsyrǵan edi.

Buǵan deıin mınıstr qashyqtyqtan jumys isteý múmkindigi bar barlyq kásiporyndar men mekemeler osy rejımge aýysýǵa mindetti ekenin málimdedi.

Sondaı-aq, kásipkerler ózderiniń buıryǵymen qysqartylǵan jumys rejımine kóshýge quqyly.

Eske sala ketsek, QR Prezıdentiniń Jarlyǵymen Dúnıejúzilik densaýlyq saqtaý uıymynyń jańa COVID-19 koronavırýsyn pandemııa dep jarııalaýyna baılanysty QR barlyq aýmaǵynda 2020 jylǵy 16 naýryz 08 saǵat 00 mınýt pen 2020 jylǵy 15 sáýir 07 saǵat 00 mınýt aralyǵynda tótenshe jaǵdaı engizildi.

Sondaı-aq Qazaqstan azamattaryna 15 sáýirge deıin el aýmaǵynan shyǵýǵa tyıym salyndy.

QR Prezıdenti Qasym-Jomart Toqaev el halqyna úndeý joldady. Joldaýdyń tolyq mátini arnaıy jarııalandy.