Býrabaıda sýǵa shomylǵan adamdarǵa bórtpe shyqqan: tekserý jumystary bastaldy
ASTANA. KAZINFORM – Kókshetaý turǵyny Býrabaı aýdanynda shomylýdyń saldary týraly habarlady, dep málimdedi Kazinform tilshisi.
Aqmola oblysynyń turǵyny shaǵymyn áleýmettik jelilerdegi paraqshalarynda jarııalady.
Áıeldiń aıtýynsha, Býrabaı aýdanyndaǵy kólderge shomylǵannan keıin onyń otbasynyń birneshe múshesinde teri bórtpeleri paıda bolǵan. Dárigerler býllezdi dermatıt dıagnozyn qoıǵan uly eń qatty zardap shekti. Qazirgi ýaqytta aýrýdyń kól sýymen tikeleı baılanysty ekenin anyqtaý qıyn. Sondyqtan áıel demalys josparlap otyrǵandarǵa saq bolýdy eskertýdi sheshken. Aqmolalyq áıel quzyretti organdarǵa da habarlasty, qazirgi kezde tekserý jumystary júrgizilip jatyr.
Kazinform agenttiginiń suraýyna jaýap bergen Aqmola oblysy Sanıtarlyq-epıdemıologııalyq baqylaý departamenti shomylý maýsymy bastalǵannan beri demalýshylardan sý aıdyndaryna barǵannan keıin teri aýrýlary nemese allergııalyq reaktsııalar týraly eshqandaı shaǵym túspegenin habarlady.
- Qoǵamdyq shomylý úshin paıdalanylatyn sý aıdyndary ekinshi sanattaǵy sý aıdyndaryna jatqyzylǵan. Sanıtarlyq zańnama talaptaryna sáıkes jyly mezgil ishinde zerthanalyq tekserýdi qosa alǵanda sý sapasyna sanıtarlyq-epıdemıologııalyq monıtorıng júrgiziledi. Áleýmettik jelilerde jarııalanǵan aqparatqa baılanysty departament joǵaryda atalǵan demalys aımaqtarynda qosymsha sý synamalaryn alýdy jáne jospardan tys sý sapasyna monıtorıng júrgizýdi uıymdastyrady. Zerthanalyq tekserý qorytyndylary boıynsha sanıtarlyq-epıdemıologııalyq jaǵdaıǵa tıisti baǵa beriledi, - delingen jaýapta.
Dárigerler azamattardy aýrý belgileri baıqalǵan jaǵdaıda dereý medıtsınalyq kómekke júginýge shaqyrdy. Eger qandaı da bir suraqtar týyndasa nemese qorshaǵan orta faktorlarynyń jaǵymsyz áserine kúdik bolsa, qajetti tekserý jumystaryn júrgizý úshin ýákiletti organdarǵa resmı ótinish jiberilýi kerek.
