«Demalýǵa qaıtse de keledi» degen qarabaıyr túsinik týrıstik ımıdjge nuqsan keltiredi – Oljas Bektenov
ASTANA. KAZINFORM – Týrızm naryǵynda básekeniń bolmaýy qyzmet kórsetý baǵasynyń qymbattaýyna alyp keledin. Bul týraly búgin Úkimet otyrysynda Premer-Mınıstr Oljas Bektenov aıtty.
«Jalpy, elimizdiń týrıstik salasyna tartylǵan ınvestıtsııa kólemi aıtarlyqtaı arta túskeni baıqalady. Ótken jyldyń qorytyndysy boıynsha 53 paıyzǵa ósti. Dese de, keıbir óńirlerde ınvestıtsııa tartý deńgeıi kerisinshe tómendep ketkenin kórip otyrmyz. Olardyń qatarynda Atyraý, Qaraǵandy, Jetisý, Pavlodar, Aqmola jáne Batys Qazaqstan oblystaryn atap ótýge bolady. Bul óńirler tarıhı-mádenı muralarǵa baı ári kórikti jerler de kóp. Demek, ákimdikterde bul baǵyttaǵy jumysqa tıisti yqylas joq degen sóz», - dedi Úkimet basshysy.
Osy oraıda Oljas Bektenov Memleket basshysy ınfraqurylymdy keshendi túrde damytyp, servıs sapasyn túbegeıli jaqsartýdy tapsyrǵanyn eske saldy.
«Óıtkeni dál osy problemalar týrızmniń damýyna tusaý bolyp otyr. Elimizde kózdiń jaýyn alatyn kórikti jerler kóp. Biraq olarǵa jetýdiń ózi bir muń. Ázirge jaǵdaıdyń ózgeretin túri baıqalmaıdy. Mysaly, Shyǵys Qazaqstandy nemese Balqash pen Alakóldi alyp qaraıtyn bolsaq, ne sapaly jol joq, ne aıaldaıtyn arnaıy turaqtar men kempıngter qaralmaǵan. Týrıster kúıi ketken demalys oryndary men ondaǵy sanıtarııalyq talaptarǵa saı kelmeıtin qolaısyz jaǵdaılarǵa moıynsunýǵa májbúr», - dedi ol.
Sonymen qatar Premer-Mınıstr naryqta básekeniń bolmaýy qyzmet kórsetý baǵasynyń qymbattaýyna alyp keletinin basa aıtty.
«Báseke joq jerde, servıs sapasy da aqsaı beretini anyq. Týrıstik bızneste «Demalýǵa qaıtse de keledi?» degen qarabaıyr túsinik qalyptasqan. Dál osyndaı kózqaras elimizdiń týrıstik ımıdjine nuqsan keltiredi», - dedi Úkimet basshysy.
