Demalysta shyǵysta kún jylyp, soltústikte aıaz saqtalady

ASTANA. KAZINFORM – Aldaǵy kúnderi el aýmaǵyndaǵy aýa raıy Atlantıka aımaqtarynan jyljyp kele jatqan tsıklon men belsendi atmosferalyq fronttardyń yqpalynda qalyptasady. 

Onyń áserinen qar jaýyp, ońtústik óńirlerde jańbyr men qar túrindegi jaýyn-shashyn bolyp, boran soǵyp jáne jel kúsheıedi.

Tsıklon el aýmaǵy arqyly ilgerilegen saıyn, terrıtorııanyń edáýir bóligine jylyraq aýa massalarynyń enýi bastalady, sonyń nátıjesinde aýa temperatýrasy birtindep joǵarylaıdy: túngi ýaqytta ortalyq jáne shyǵys óńirlerde -5…-18°S-qa deıin, ońtústik-shyǵysta -2…-7°S-qa deıin, taýly aýdandarda -7…-15°S-qa deıin kóteriledi.

Soltústik oblystarda túngi aýa temperatýrasy -20…-35°S shamasynda bolyp, aıazdy aýa raıy saqtalady.

Sonymen qatar, quramynda sýyq arktıkalyq aýa shoǵyrlanǵan antıtsıklon jotasy eldiń batys óńirlerine taralyp, túngi ýaqytta aýa temperatýrasynyń -15…-30°S-qa deıin, al soltústik-batysta -20…-35°S-qa deıin tómendeýine sebep bolady.

Aıta ketelik Óskemende eki kún boıy aýaǵa taraǵan zııandy zattardyń mólsheri shekti deńgeıden asqan edi.