Demalys jarııalandy: Kongo quramasy 52 jyldan keıin álem chempıonatyna joldama aldy
ASTANA. KAZINFORM — Kongo Demokratııalyq Respýblıkasynyń quramasy sońǵy 52 jylda alǵash ret fýtbol boıynsha álem chempıonatyna joldama aldy. Elde tarıhı oqıǵany toılaý úshin ulttyq mereke jarııalandy, dep habarlaıdy BBC.
«Barystar» ulttyq qurama komandasy pleı-off kezeńinde ıAmaıkany 1:0 esebimen jeńgennen keıin, bılik demalys kúnin jarııalaýǵa sheshim qabyldady. Jalǵyz goldy qosymsha ýaqytta (100-shy mınýt) buryn Manchester ıÝnaıted komandasynda oınaǵan qorǵaýshy Aksel Týanzebe soqqan.
Eldiń eńbek jáne jumyspen qamtý mınıstrligi jeńisti «tarıhı» dep baǵalap, qosymsha demalys kúni azamattar ony «birlik, qýanysh jáne ulttyq maqtanysh atmosferasynda» atap ótetinine senim bildirdi.
Bul eldiń álem chempıonatyna ekinshi ret qatysýy, olar alǵash ret 1974 jyly «Zaır» atymen týrnırge shyqqan.
Kınshasa astanasynda kóp mekemeler, sonyń ishinde bankter men dúkender bir kúnge jabyldy, biraq mereke kesh jarııalanǵandyqtan keıbir jumys berýshiler qyzmetin jalǵastyrdy.
Jergilikti ýaqytpen túngi saǵat bir shamasynda sońǵy sybyzǵy úni shyqqannan keıin, Kınshasa turǵyndary kóshelerge shyǵyp, jeńisti toılady. Kórermender emotsııalarymen bólisip, quramanyń jetistigi eldegi qıyn jaǵdaıǵa qaramastan maqtanýǵa sebep boldy dep atap ótti.
Álem chempıonatyndaǵy alǵashqy oıyndaryn Kongo 17 maýsymda Portýgalııa quramasyna qarsy ótkizedi, onda Krıshtıaný Ronaldý oınaıdy. Sondaı-aq toptaǵy qarsylastary — Kolýmbııa jáne Ózbekstan quramalary bolady.
Kongo AQSh, Meksıka jáne Kanada qabyldaıtyn álem chempıonatynyń fınalyna joldama alǵan Afrıkanyń on komandasynyń bir boldy.
Aıta keteıik, qazaqstandyq jas fýtbolshy «Barselona» quramyna qosyldy.
