Demalys oryndaryna ózińmen tamaq alyp barý zańdy ma

ASTANA. KAZINFORM — Jazǵy demalys maýsymy aıaqtalýǵa taıap qaldy, qazir demalys oryndarynyń jumysy qyzyp tur. Kazinform agenttigi tutynýshylardyń quqyǵyna qatysty bir jaıtty naqtylap kórgen edi.

Keıbir demalys oryndarynyń ákimshiligi (demalys aımaǵy, otbasylyq demalys kesheni, basseın, jaǵalaý taǵy basqa) kelýshilerge ózimen birge as (tamaq), azyq-túlik, sýsyn ákelýge tyıym salady, ıaǵnı sol demalys ornynan satyp alý qajet.

Bul qanshalyqty zańdy? Osy suraqtyń jaýabyn bilý úshin Tutynýshylardyń quqyǵyn qorǵaý komıtetine júgingen edik. 

— «Tutynýshylardyń quqyǵyn qorǵaý týraly» zańnyń 24-babynyń talabyna sáıkes, satýshy (daıyndaýshy, oryndaýshy) taýar, jumys jáne qyzmetti qazaq jáne orys tilinde berýge mindetti. Aqparatta kórsetiletin qyzmettiń ataýy, túri men ereksheligi kórsetilýi tıis. Aqparat tutynýshynyń nazaryna qujat, arnaıy jazba belgi nemese jeke jetkiziledi. Osylaısha, eger kelýshi kirý bıletin tólep, demalys aımaǵyna óz ónimderimen kirgen bolsa, aımaq sýbektisi qoldanystaǵy tyıym týraly habarlamaǵan bolsa, onda tutynýshyǵa qyzmet kórsetýden bas tartý zańsyz, — degen jaýap aldyq resmı saýalǵa.

Komıtet usynǵan málimetke sáıkes, tutynýshy men kásipkerlik sýbektileri arasynda týyndaıtyn quqyqtyq qatynas jarııa quqyqtyq qatynasqa jatady. 

— Azamattyq kodekstiń 387-babyna sáıkes kásipkerlik qyzmetti júzege asyratyn adam óz qyzmetiniń sıpaty boıynsha oǵan júgingen árbir adamǵa qatysty júzege asyrýǵa tıis taýarlardy satý, jumysty oryndaý nemese qyzmet kórsetý jónindegi onyń mindetin belgileıtin jarııa shart bolýy tıis. Azamattyq kodekstiń 387-babynyń 4-tarmaǵyna sáıkes zań qujatta kózdelgen jaǵdaıda jarııa shartyn jasaý jáne oryndaý kezinde taraptar úshin mindetti erejeler shyǵarýy múmkin. Rekreatsııalyq aımaqtar qyzmetiniń máseleleri ártúrli normatıvtik quqyqtyq aktilermen (týrıstik, ekologııalyq, densaýlyq saqtaý, sáýlet, qala qurylysy jáne qurylys taǵy basqa) retteledi, — deıdi vedomstvodan.

Sondaı-aq elimizde erekshe qorǵalatyn tabıǵı aýmaqtardaǵy demalys erejeleri jekelegen zańmen retteledi. 

Aıta keteıik, elimizde tutynýshylardyń quqyǵyn vırtýaldy qorǵaıtyn kómekshi ázirlenip jatyr. 

Taǵy bir jaıt, Qazaqstanda tutynýshylardyń quqyǵy qorǵalyp jatqan joq. Kazinform tilshisine bergen suhbatynda «Sapa» tutynýshylar quqyqtaryn qorǵaý jónindegi ulttyq uıym» qoǵamdyq birlesti tóraǵasynyń orynbasary Tursyn Jaǵyparova osylaı dep pikir bildirgen edi. Oǵan sońǵy kezde tutynýshylardan túsetin tolassyz shaǵym dálel ekenin aıtady.