Demalys maýsymy: SІM qaýip-qater joǵary aımaqtardy atady
ASTANA. KAZINFORM — Qazaqstannyń Syrtqy ister mınıstrligi azamattarǵa Iranǵa saparlaýdan bas tartýǵa keńes beredi. Bul týraly Senattaǵy brıfıngte QR Syrtqy ister mınıstriniń birinshi orynbasary Erjan Ashyqbaev málimdedi.
E. Ashyqbaev demalys maýsymynda saparlaý qaýpi joǵary elder týraly tilshiler suraǵyna jaýap berdi jáne mınıstrlik álemniń túrli óńirlerindegi ahýaldy turaqty baqylap otyrǵanyn aıtty.
— Azamattarymyzdyń quqyqtaryn qorǵaý men múddelerin qamtamasyz etý — Qazaqstannyń syrtqy saıasatynyń negizgi mindetteriniń biri. Sondyqtan biz álemdegi saıası jaǵdaıdy, tabıǵı apattardy jáne ekonomıkalyq sıpattaǵy qıyndyqtardy únemi qadaǵalap otyramyz, — dedi Erjan Ashyqbaev.
Onyń aıtýynsha, osyndaı monıtorıng nátıjesinde memlekettik organdar azamattarǵa tıisti usynymdar jarııalap keledi.
— Afrıka elderindegi kúrdeli epıdemıologııalyq ahýal týraly aqparattardy estip, kórip otyrmyz. Taıaý Shyǵystaǵy qaqtyǵys ta barshaǵa málim. Sondyqtan bizdiń jáne ózge de memlekettik organdardyń, sonyń ishinde Densaýlyq saqtaý mınıstrliginiń epıdemıologııalyq jaǵdaıǵa qatysty usynymdaryna qazaqstandyqtardyń muqııat nazar aýdarǵany jón, — dedi ol.
Erjan Ashyqbaev qazirgi ýaqytta Iranǵa saparlaýǵa keńes berilmeıtinin jetkizdi. Sondaı-aq ol Afrıkanyń birqatar memleketterine de barmaǵan jón ekenin jetkizdi. Alaıda olardyń tolyq tizimi keıinirek jarııalanady.
— Afrıkadaǵy birneshe elge barý usynylmaıdy. Olardyń tolyq tizimin belgilengen tártippen qosymsha usynamyz, — dedi SІM ókili.
Buǵan deıin Erjan Ashyqbaev qazaqstandyqtardyń jartysyna jýyǵy AQSh vızasyn ala almaı júrgenin aıtqan edi.
