Demalys kúngi jármeńkelerge turaqtandyrý qorlarynyń ónimderi shyǵaryldy
ASTANA. KAZINFORM – Elde jyl basynan 600-ge jýyq demalys kúngi aýyl sharýashylyq jármeńkesi ótken.
Qazaqstannyń barlyq óńirinde dástúrli aýyl sharýashylyǵy jármeńkesi ótti. Oǵan óńirdegi turaqtandyrý qorlarynyń ónimderi shyǵaryla bastady.
Máselen Aqtaýda turaqtandyrý qorynan 2 tonna kartop, árqaısysy 1 tonnadan sábiz, pııaz, qyryqqabat, 1 tonna sıyr eti, 1000 lıtr suıyq maı, 500 keli as tuzy men 1,5 tonna kúrish, 700 keli rojkı shyǵarylyp, satyldy.
Al Atyraý oblysynda ótken jármeńkege 1,2 tonna kókónis ónimderi, 1 tonna sıyr eti, 0,6 tonna sút ónimderi men 0,4 tonna qus eti turaqtandyrý qorynan shyǵarylǵan.
Ulytaý oblysynyń turaqtandyrý qorynan turǵyndarǵa 400 dana jumyrtqa, 1 tonna sıyr eti, 20 keli rojkı, 20 keli qaraqumyq, 50 keli un satyldy.
Qyzylordada ótken jármeńkede «Baıqońyr» áleýmettik-kásipkerlik korporatsııasynyń turaqtandyrý qorynyń ónimderi saýdalandy. Onda kartop 160 teńgeden, pııaz 126, sábiz 135, qyryqqabat 130, kúrish 230, un 140, sıyr etiniń kelisi 2500 teńgeden satyldy.
Turaqtandyrý qorlarynan bólek jármeńkege myńǵa jýyq otandyq taýar óndirýshiler men kásipkerler qatysty. Qazaqstandyqtarǵa keń taýar assortımenti usynyldy. Mysaly, Soltústik Qazaqstan oblysynda ótken jármeńkede jergilikti kásipkerler 25 túrli taýar túrin usynyp, jalpy somasy 7,7 mln teńgeni quraıtyn 4847 kg ónim satqan. Al Óskemende ótken jármeńkede kásipkerler 15 tonna ónim usynǵan. Onyń ishinde et, bal jáne sút ónimderi basymdyqqa ıe.
Al Astana qalasyndaǵy aýyl sharýashylyǵy jármeńkesine jergilikti fermerler ǵana emes. Abaı, Pavlodar, Qaraǵandy jáne Aqmola oblystarynan kelgen aýyl sharýashylyǵy taýar óndirýshileri qatysty. Astanadaǵy jármeńkede sıyr etine suranys joǵary. Et ónimderinen sıyr eti 3300–3500 tg/kg, jylqy eti 3000–3300 tg/kg, qoı eti 3500 tg/kg usynylǵan.
Jármeńkede shamamen 60 tonna bakaleıa ónimi, 50 tonna kókónis ónimi, 50 tonna et ónimi, sondaı-aq kókónister men jemister, et, un jáne sút ónimderi, tabıǵı shyryndar, tosaptar, djemder jáne basqa da ónimder naryqtyq baǵadan tómen saýdalandy.
Úkimettiń tapsyrmasyna saı aldaǵy aptada da óńirlerde turaqtandyrý qorlaryndaǵy ónimderdi jármeńkelerge shyǵarý jalǵasady.
