Elordada 200-den astam kólik apaty boldy - júrgizýshilerge eskertý jasaldy

ASTANA. KAZINFORM – Ótken demalys kúnderi Astanada 200-den astam kólik oqıǵasy tirkeldi. Bul týraly Astana qalasy Polıtsııa departamentiniń baspasóz qyzmeti habarlady.

«Ótken demalysta elorda joldarynda 200-den astam jol-kólik oqıǵasy tirkeldi. Osy oraıda, júrgizýshilerge barynsha muqııat jáne saq bolýdy, belgilengen jyldamdyqty saqtap, qaýipsiz araqashyqtyqty saqtaý keregin eskertemiz. Qıylystarǵa, jaıaý júrginshiler ótkelderine jáne qoǵamdyq kólik aıaldamasyna jaqyndaǵanda jyldamdyqty aldyn ala azaıtýdy, sondaı-aq kenetten manevr jasamaýdy usynamyz», - dedi Astana qalasy PD Jol polıtsııasy qyzmeti bólimderiniń bastyǵy Erjan Ádilbekov.

Sondaı-aq tártip saqshysy jaıaý júrginshiler de erekshe saq bolýy keregin eske saldy.

«Joldy kesip ótý kezinde barlyq kólikterdiń tolyq toqtaǵanyna kóz jetkizińiz. Jol qozǵalysy erejelerin qatań saqtaý jáne muqııat bolý sizdiń ómirińizdiń qaýipsizdigin arttyrady», - dep túıdi sózin Erjan Ádilbekov.

Búgin elordada tań ata jaýǵan qyrbaq qar áli tolastar emes. Qardyń mol túsýine baılanysty elordanyń kommýnaldyq qyzmeti táýlik boıy aýysymdyq rejımde jumys istep, qala kóshelerin qardan tazartady.