Demalys kúnderi el aýmaǵynda jańbyr men naızaǵaı, qatty jel boljandy
ASTANA.KAZINFORM — «Qazgıdromet» RMQ 27–29 maýsymǵa arnalǵan Qazaqstan boıynsha aýa raıy boljamyn jarııalady.
— Aldaǵy demalys kúnderi belsendi tsıklon men atmosferalyq frontaldy bólikterdiń ótýine baılanysty elimizdiń basym bóliginde aýa raıy qubylmaly bolady. Jańbyr jaýyp, naızaǵaı oınaıdy, jel kúsheıedi, keı jerlerde burshaq jaýýy múmkin. Elimizdiń batysynda, soltústik-batysynda jáne soltústiginde qatty jańbyr jaýady dep boljandy, — delingen habarlamada.
Kúndizgi aýa temperatýrasy respýblıkanyń batysy men soltústik-batysynda +18…+26 °C-qa deıin tómendeıdi. Ońtústik óńirlerde aptap ystyqtyń azdap báseńdeýi kútilip, aýa temperatýrasy +28…+38 °C aralyǵynda bolady. Soltústik óńirlerde kúndiz +22…+30 °C kútiledi.
Sonymen qatar, Qazaqstannyń shyǵysynda, soltústik-shyǵysynda, ońtústik-shyǵysynda jáne ortalyq óńirlerinde ystyq aýa raıy saqtalady. Kúndiz aýa temperatýrasy +33…+38 °C-qa deıin kóterilip, jekelegen aýdandarda óte qatty ystyq +40 °C-qa deıin jetedi dep boljanyp otyr.
Aıta keteıik, Astanada 85 jyl burynǵy ystyq rekord qaıta tirkeldi.
