Demalys kúnderi aptap ystyq qaıtyp keledi
ASTANA. KAZINFORM – Qazgıdromet 8–10 tamyzǵa arnalǵan Qazaqstan boıynsha aýa raıy boljamyn jarııalady.
Qazaqstan aýmaǵyndaǵy aýa raıyn aýqymdy antıtsıklon qalyptastyrady. Sonyń áserinen elimizdiń basym bóliginde ystyq ári qurǵaq aýa raıy kútiledi.
Kezeńniń sońyna qaraı elimizdiń batysy men soltústik-batysynda soltústik-batys tsıklony jáne onymen baılanysty atmosferalyq frontaldy bólikterdiń yqpalynan jańbyr jaýyp, naızaǵaı oınaıdy, jel kúsheıedi, keı óńirlerde burshaq jaýýy múmkin.
Respýblıkanyń shyǵysynda kezeńniń basynda, sondaı-aq ońtústik jáne ońtústik-shyǵystyń taýly aýdandarynda barlyq kúnderi ońtústik tsıklonnyń áserinen jańbyr jaýyp, naızaǵaı kútiledi.
Barlyq óńir turǵyndaryn aptap ystyqtyń kezekti tolqyny kútip tur. Iran aýmaǵynan keletin jyly aýa massalarynyń áserinen elimizdiń soltústigi men shyǵysynda aýa temperatýrasy 35–39°S-qa deıin, ońtústiginde 35–41°S-qa deıin, al batysy men ortalyǵynda 36–41°S-qa deıin kóterilip, óte qatty ystyq bolady.
Aıta ketelik búgin elimizdiń basym bóliginde aýa raıy jaýyn-shashynsyz bolady.
