Demalys kúni Túrkistandaǵy joldardyń bir bóligi ýaqytsha jabylady
ASTANA. KAZINFORM — 2025 jyldyń 26 qazanynda «Birinshi bolý — batyldyq» korporatıvtik qorynyń uıymdastyrýymen tórtinshi halyqaralyq Turkistan Marathon ótedi, dep habarlaıdy oblys ákimdiginiń baspasóz qyzmeti.
Marafonǵa Túrki halyqtarynyń marafon alıansyna (TAN) múshe jáne oǵan 20-dan astam elden 3000 qatysýshy keledi, olardyń ishinde 2900-y — ózge qalalar men elderden arnaıy keletin sportshylar.
26 qazan kúni saǵat 7:20–den 14:00–ge deıin marafon qashyqtyqtary ótetin jol ýchaskelerinde kólik qozǵalysy ishinara shekteledi. Qatysýshylardyń jarys jolyn eńserýine qaraı joldar kezeń-kezeńimen ashylady. Sóre men máre aımaǵy «Karavan Saray Turkistan» turaq aýmaǵynda ornalasady.
— Osyǵan baılanysty Tutqabaev kóshesi men Bekzat Sattarhanov dańǵylynan Ál qoja Ata kóshesine deıingi jol bóligi 25 qazan kúni saǵat 9:00–den 26 qazan kúni saǵat 20:00–ge deıin jabylady. 26 qazanda «Karavan Saray Turkistan» aınalasyndaǵy Ál Qoja Ata, Batyrbekov kósheleri jáne Bekzat Sattarhanov dańǵyly boıyndaǵy qozǵalys 7:20–dan 09:10–ǵa deıin tolyq toqtatylady. Bekzat Sattarhanov dańǵyly men Tutqabaev kóshesinen Esim han dańǵylyna deıingi aralyqta kólik qozǵalysy 8:15–ten 14:00–ge deıin tolyq jabylady, — delingen habarlamada.
Esim han dańǵylymen Bekzat Sattarhanov dańǵylynan áýejaıǵa deıingi aralyqta qozǵalys 8:40–tan 13:20–ǵa deıin ishinara shekteledi. Dańǵyldyń soltústik jaǵy kólikterdiń ótýi úshin ashyq bolady.
Aıta keteıik, jeksenbi kúni ótetin Turkistan Marathon-2025 óńirdiń etno-mádenı murasyn beıneleıtin iri sporttyq oqıǵa bolmaq. Bıylǵy is-sharada tórt negizgi qashyqtyq usynylady: 42,2 shaqyrym, 21,1 shaqyrym, 10 shaqyrym, 10 shaqyrym skandınavııalyq júris, sondaı-aq 10-14 jas aralyǵyndaǵy balalarǵa arnalǵan 3 shaqyrym qashyqtyǵy.
Turkistan Marathon — Halyqaralyq marafondar men qashyqtyqtyq júgirýler qaýymdastyǵynyń (AIMS) múshesi. AIMS quramynda álemniń 111 elinen 446-dan astam marafon bar. AIMS músheliginiń basty talaptarynyń biri — trassanyń World Athletics jáne AIMS uıymdarynyń qatysýymen ótetin halyqaralyq sertıfıkattalýy. AIMS músheligi marafonnyń halyqaralyq deńgeıde moıyndalǵanyn bildiredi jáne sheteldik qatysýshylardy tartýǵa múmkindik beredi.
Turkistan Marathon-nyń AIMS resmı kúntizbesine engizilýi — sharanyń álemdik standarttarǵa saı uıymdastyrylǵanyn jáne jahandyq júgirý qaýymdastyǵynyń nazarynda ekenin kórsetedi. Sonymen qatar Turkistan Marathon túrki elderiniń iri marafondaryn biriktiretin TAN (Turkic Alliance of Long Runs) serııasynyń bóligi bolyp sanalady.
Sóre ýaqyty:
07:30 — 3 shaqyrym (10-14 jas aralyǵyndaǵy balalar)
08:20 — 42,2 shaqyrym qatysýshylarynyń sóresi
08:25 — 21,1 shaqyrym qatysýshylarynyń sóresi
08:40 — 10 shaqyrym jáne skandınavııalyq júristiń sóresi
Budan buryn Túrkistan tórinde tól kúresimizden Azııa chempıonaty ótetini belgili boldy.