«Dem alý múmkin emes»: Óskemen turǵyndary aýa sapasynyń kúrt nasharlaǵanyna shaǵymdandy
ÓSKEMEN. KAZINFORM – Tańerteńnen beri Óskemen qalasynyń turǵyndary aýa sapasynyń kúrt nasharlap ketkenine shaǵymdanyp jatyr.
Búgin áleýmettik jelide qala kóshelerinde aýa sapasynyń nasharlap ketýinen halyqtyń maska taǵyp, bet-aýzyn moıynoraǵyshpen qymtap alyp ketip bara jatqan vıdeolar tarap ketti.
Muny ásirese Nazarbaev dańǵylynda ornalasqan Dostyq úıi men Gagarın býlvary kóshesiniń mańyndaǵy turǵyn úılerdiń halqy sezgen.
«Tańerteńnen dem alý múmkin emes. Aýada bir qyshqyltym dám seziledi. Óskemenniń ekologııa máselesi ońyp turmaǵanyn bárimiz bilemiz ǵoı. Biraq búgin aýa sapasy kúrt nasharlap ketti», - deıdi Nurdáýlet esimdi qala turǵyny.
Buǵan deıin ShQO tótenshe jaǵdaılar departamenti 20 qarasha kúni Óskemende 2 dárejeli qolaısyz meteorologııalyq jaǵdaı qalyptasatynyn jarııa etken. Bunyń da áseri bar bolýy múmkin. Dese de aýa sapasyna qatysty naqty baǵany oblystyq ekologııa departamenti bere alady. Qazir departament mamandary oqıǵa ornyna baryp, aspaptyq ólsheýler júrgizdi.
«Gagarın býlvary kóshesinde gaz analızatorymen azot dıoksıdi men formaldegıdti ólsheý jumystary júrgizildi. Onyń nátıjeleri shyqqan soń birden habarlanady», - dep habarlady ShQO ekologııa departamentiniń baspasóz qyzmetinen.
Aıta keteıik, búgin elimizdiń 6 qalasynda jaısyz meteorologııalyq jaǵdaılar qalyptasyp, aýa lastanatyny habarlandy. Atalǵan qalalardyń ishinde Óskemen de bar.
Sondaı-aq osyǵan deıin Almatyda ekologııalyq normalardy buzǵan júrgizýshilerge 437 mln aıyppul salynǵany habarlanǵan.
