«Delta Bank» salymshylaryna agent bank arqyly tólem jasaý merzimi uzartyldy

ALMATY. QazAqparat - Qazaqstannyń depozıtterge kepildik berý qory (QDKBQ, Qor) «Delta Bank» AQ salymshylaryna kepildik berilgen ótemdi tóleýdi sońǵy kúnin qosa sanaǵanda 2022 jyldyń 1 mamyryna deıin uzartý týraly «Bank TsentrKredıt» AQ-pen kelisimge qol qoıdy, dep habarlaıdy QazAqparat tilshisi.

Kórsetilgen merzim ishinde «Delta Bank» AQ salymshylary agent banktiń jergilikti bólimshelerine júginip, kepildik berilgen ótemdi tóleý jónindegi ótinishti tikeleı nemese senim bildirilgen tulǵa arqyly bere alady. Jeke ózi kelgen jaǵdaıda salymshynyń jeke basyn kýálandyratyn qujaty bolsa jetkilikti, al eger senim artylǵan tulǵa keletin bolsa, salymshynyń atynan ótem alý quqyǵyn rastaıtyn quqyq belgileýshi qujattardy usynady (mysaly, notarıýs kýálandyrǵan senimhat).

«Delta Bank» AQ salymshylaryna kepildik berilgen ótem agent bank arqyly 2018 jyldyń 17 mamyrynan beri tólenip keledi. Úsh jyl ishinde jalpy somasy 107,3 mln teńgege ótem tólendi. Bul qor mindettemeleriniń jalpy somasynyń 53 paıyzyn quraıdy.

«2021 jyldyń 1 mamyryna qaraı kepildik berilgen ótemdi alý úshin 328 salymshy ǵana ótinish bergen. Bul olardyń jalpy sanynyń 12 paıyzyn quraıdy. Agent bankke kelýshiler sanynyń az bolýy «Delta Bank» AQ-ta ashylǵan shottar men depozıtterdegi qaldyq aqshalardyń azdyǵyna baılanysty bolyp otyr. Naqty aıtar bolsaq, 963 salymshynyń árbiriniń shotyndaǵy qaldyq aqsha 1000 teńgeden tómen, sondaı-aq 412 salymshynyń shottarynda – 1 000 teńgeden 5 000 teńgege deıin bolsa, 158 salymshyda - 5 000 teńgeden 10 000 teńgege deıin bar»,-delingen habarlamada.

Degenmen «Delta Bank» AQ-taǵy shottarynda 100 000 jáne 1 000 000 teńgeden astam qarajat jınaǵan salymshylardyń da bar ekenin aıta ketken jón. Sondyqtan Qor osy jáne kepildik berilgen ótemdi alýǵa quqyǵy bar basqa da salymshylar úshin agent bank arqyly tólem alý merzimin sońǵy kúnin qosa sanaǵanda 2022 jyldyń 1 mamyryna deıin uzartty.

2022 jyldyń 1 mamyrynan keıin «Delta Bank» AQ salymshylary burynǵydaı Qorǵa ótem alýǵa tikeleı ótinish bere almaıdy. Qor talap etilmegen kepildik berilgen ótemdi Qazaqstan Respýblıkasynyń zeınetaqymen qamsyzdandyrý zańnamasyna sáıkes depozıtordyń atyna Biryńǵaı jınaqtaýshy zeınetaqy qorynda ashylǵan, erikti zeınetaqy jarnalaryn esepke alýǵa arnalǵan jeke zeınetaqy shotyna aýdarady.

Eske salsaq, Delta Bank-tiń burynǵy top-menedjeri ustaldy.