«Delta Bank» KASE-niń saýda-sattyq sharalarynan alastatyldy

ASTANA. QazAqparat - Qazaqstandyq qor bırjasynyń sheshimimen (KASE) 25 sáýirden bastap, KASE-niń «valıýtaly», «qorlandyrylǵan» dárejeleri boıynsha múshesi bolyp tabylatyn «Delta Bank» AQ qundy qaǵazdar jáne sheteldik valıýtalar saýdasynan shettetildi. Bul týraly QazAqparat habarlaıdy.

KASE-niń aqparattary boıynsha, osy sheshimmen basqarma ókilderi banktiń klırıngtik qatysýshysynyń mártebesin joıdy.

Sheshim KASE-niń «Múshelik týraly ereje» dep atalatyn ishki qujatynyń 11 baby, 1 bólimi, 6) tarmaqshasynyń jáne «Qarjylyq quraldarmen kelisimsharttar boıynsha klırıngtik qyzmetti júzege asyrý erejesi» atty ishki qujattyń 6 baby, 1 bólimi, 2) tarmaqshasynyń talaptary negizinde, banktiń bırja saýdasynda jasaǵan kelisimderi boıynsha óziniń moınyna alǵan mindettemelerin oryndamaýyna baılanysty qabyldandy.

25 sáýirde banktiń sheteldik valıýtalar naryǵynda mindettemeleri joq bolatyn. Banktiń osy kúnge oryndalmaǵan mindettemeleri onyń aktıvteri tarapynan qamtamasyz etildi. Sáıkesinshe, bank tarapynan óziniń mindettemelerin oryndamaý áreketi bırjanyń ózge múshelerine teris áser ete almaıdy, delingen habarlamada.

Buǵan qosa, osy sheshim negizinde banktiń KASE-ge músheligi toqtatyldy. Óıtkeni qatysýshysynyń bırjalyq saýdadan shettetilýi avtomatty túrde onyń múshelikten shyǵýyn talap etedi.