Delıde Qazaqstan men Úndistan iskerlik keńesiniń otyrysy ótti
BEIJІŃ-DELI. QazAqparat - Delıde Qazaqstan-Úndistan iskerlik keńesiniń 2-shi otyrysy ótti, dep habarlaıdy Qytaıdaǵy «QazAqparat» HAA menshikti tilshisi.
Atalǵan shara Qazaqstan jáne Úndistan elshilikteriniń uıytqy bolýymen jáne eki eldiń Syrtqy saýda palatalarynyń uıymdastyrýymen qolǵa alynǵan. Jıynǵa Qazaqstannyń 30 kompanııasy qatysty. «Tengri Bank» AQ, «Qazaqstan Temir Joly» AQ, «INTERTICh» Densaýlyq saqtaý jáne Medıtsınalyq Saqtandyrý Korporatsııasy», «Eır Astana» áýe kompanııasy, «Zaman Group» kompanııalar toby, «PRIME GROUP Managing Company LLP», «Atameken», «Santo Member of Polpharma Group» sııaqty kóptegen kompanııalar qatysty.
Úndistan jaǵynan 100-den astam kompanııa qatysty. Olardyń arasynda «GMR Group», «TATA Projects Ltd.», «Artemis Hospitals», «Mahindra & Mahindra Ltd», «Air India», «Chandan Steel Group», «Multiwyn Industries Pvt. Ltd», «Escorts Limited», «Sonalika International Tractors Ltd.», «RELIANCE», «CAPEXIL» sııaqty qazaqstandyq áriptesterimen seriktestik ornatýǵa daıyn kóptegen kompanııalar bar.
Jıynda úndistandyq iskerlik keńes atynan «RRB Energy Limited» tóraǵasy Rakesh Bakashı, ÚR-daǵy QR Elshisi Bolat Sársenbaev, «Tengri Bank» basqarma tóraǵasy Erjan Shaıkenov, jáne Úndistandaǵy syrtqy ister mınıstrliginiń ókili Godavarthı Venkata Srınıvas sóz sóıledi.
«KAZAKH INVEST «UQ» AQ basqarýshy dırektory Jandos Orazalıev Qazaqstannyń ınvestıtsııalyq múmkindikteri týraly tanystyrylym ótkizdi. Úndistandyq kásipkerler ózderiniń kásipkerlik taqyryptaǵy dúnıelerin qatysýshylarǵa usyndy.
Jıyn aıasynda V2V formatynda kelissózder jasalyp, ek el arasynda birneshe bastapqy kelisimder jasaldy. Olardyń qatarynda Qazaqstandaǵy aýyl sharýashylyǵy, qurylys jáne traktor tehnıkasyn jasaý sııaqty jobalar bar. Qaraǵandy jáne Mańǵystaý oblystaryndaǵy energetıkalyq jobalar, «Qazaqstan Temir Joly» AQ júk termınalyn salý sııaqty kóptegen josparlar qarastyryldy.
Іskerlik keńestiń qorytyndysyna sáıkes Qazaqstan men Úndistan aarasyndaǵy saýda-ekonomıkalyq jáne ınvestıtsııalyq yntymaqtastyq boıynsha jańartylǵan Jol kartasy qabyldandy. Alǵashqy Jol kartasy eki eldiń premer-mınıstrleriniń qatysýymen 2015 jyldyń shildesinde qabyldanǵan bolatyn.
Іskerlik keńestiń 3-shi otyrysy 2019 jyly Qazaqstanda ótedi dep josparlandy.
