Delıde Qazaqstan armııasynyń 26 jyldyǵy atalyp ótti

BEIJІŃ-DELI. QazAqparat - Úndistan Respýblıkasyndaǵy Qazaqstan Respýblıkasy Qorǵanys mınıstrliginiń áskerı attashe apparaty QR Qarýly Kúshteriniń 26 jyldyǵyna oraı qabyldaý júrgizdi, dep habarlaıdy QazAqparat tilshisi.

Іs-sharaǵa Qazaqstan Respýblıkasynyń Úndistandaǵy Elshisi Bolat Sársenbaev, Úndistan Qorǵanys mınıstrliginiń halyqaralyq yntymaqtastyq departamentiniń bastyǵy Shambý Kýmaran, Nıý-Delıdegi dıplomatııalyq ókildikter, shet memleketterdiń áskerı attasheleri, qorǵanys ónerkásibi kásiporyndarynyń ókilderi, Úndistannyń áleýmettik-saıası jáne isker toptarynyń basshylary qatysty.

Qazaqstan men Úndistan memleketteriniń ánurandary oryndalǵannan keıin jınalǵandarǵa arnap Bolat Sársenbaev sóz sóıledi. Ol óz sózinde áskerı-tehnıkalyq yntymaqtastyq - Qazaqstan men Úndistan Respýblıkasy arasyndaǵy strategııalyq áriptestiktiń basym baǵyttarynyń biri ekenin atap ótti.

Al Úndistandaǵy Qazaqstan Respýblıkasy Qorǵanys mınıstrliginiń áskerı attashesi Mahambet Bısenov eki eldiń Qarýly Kúshteriniń yntymaqtastyǵyn tereńdetýge qazaqstandyq taraptyń daıyn ekendigin bildirdi.

Qonaqtar shara barysynda Qazaqstan, onyń áskeri men áskerı-ónerkásiptik kesheni týraly fotosýretter men beınelerdi tamashalady.
Eske sala ketsek, 1992 jyldyń 7 mamyrynda Qazaqstan Respýblıkasynyń Prezıdenti Nursultan Nazarbaevtyń Jarlyǵymen QR Qarýly Kúshteri qurylǵan bolatyn.