Delı áýejaıynda Qazaqstan azamaty jalǵan áýe bıletimen ustaldy
ASTANA. QazAqparat - Delı áýejaıynda Qazaqstan azamaty jalǵan áýe bıletimen ustaldy. Bul týraly búgin QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.
«Bizge kelip túsken aqparatqa sáıkes Delı qalasynyń áýejaıynda Qazaqstannyń bir azamatyn áýe bıletin qoldan jasaǵany úshin jergilikti polıtsııa ustady. Ol 10 myń rýpıı kóleminde aıyppul tólegennen keıin bosatylady. Qazir ol Delı qalasynda», - resmı ókil.
Onyń aıtýynsha, Qazaqstannyń Úndistandaǵy Elshiliginiń konsýly ustalǵan azamatqa qoldan kelgen kómekti kórsetýde.
«Tólqujaty jergilikti polıtsııanyń qolynda. Aıyppuldy tólegennen keıin qaıtaryp beredi», - dedi Aıbek Smadııarov.
