Deldalsyz ári arzan: «Dala dáminde» 3,5 myń tonna aýyl ónimi satyldy
ASTANA. KAZINFORM — Qazaqstannyń barlyq óńirinde ótip jatqan «Dala dámi» jármeńkelerinde satylymǵa shyǵarylǵan aýyl sharýashylyǵy ónimderiniń kólemi eki esege artyp, 3,5 myń tonnaǵa jýyqtady. Taýarlar deldalsyz satylyp, baǵasy naryqtaǵydan 20%-ǵa deıin tómen. Bul týraly Saýda jáne ıntegratsııa mınıstrligi málim etti.
Ótken aptadan beri Qazaqstannyń barlyq óńirinde QR Saýda jáne ıntegratsııa mınıstrliginiń bastamasymen «Dala dámi» aýylsharýashylyq ónimderiniń jármeńkesi ótip jatyr. Ótken aptada jármeńkede el boıynsha 2 myń tonnadan astam taýar saýdalanǵan.
Al osy demalys kúnderi ótetin «Dala dámi» jármeńkesine shyǵarylǵan otandyq aýylsharýashylyq ónimderiniń kólemi 2 ese artyp, 3 jarym myń tonnaǵa jýyq ónim satylymǵa shyǵarylǵan.
Astana qalasynda ótip jatqan «Dala dámi» jármeńkesine osy demalysta Abaı, Mańǵystaý jáne Almaty oblystarynyń sharýalary qatysyp, ónimderin usynyp otyr. Al Almaty qalasynda bir mezette 4 núktede uıymdastyrylyp jatqan jármeńkelerde 600 tonna aýylsharýashylyq ónimi satylyp jatyr. Eldegi eń úlken jármeńkelerdiń biri Shymkent qalasynda ótip jatyr. Onda fermerler 500 tonnadan astam ónim ákelgen.
Mınıstrliktiń dereginshe, «Dala dámi» jármeńkelerinde etke suranys joǵary. Sondyqtan sharýalar sıyr, jylqy, qoı jáne qus etiniń keń assortımentin usynýda. Máselen Qaraǵandy oblysyndaǵy jármeńkege 52 tonna sıyr eti satylýda. Astana qalasynda turǵyndar Abaı oblysynyń sharýalary ákelgen sıyr jáne jylqy etiniń kelisin 3500 teńgeden satyp alýda. Ózge óńirlerdegi «Dala dámi» jármeńkesindegi iri qara mal etiniń baǵasy da osyndaı. Máselen Qostanaıdaǵy jármeńkede sıyr etiniń kelisi 3200-3500 teńgeden, jylqy men qoı etiniń kelisi 3000 teńgeden bastap satylyp jatyr.
«Dala dámi» jármeńkeleri ótken aptadan bastap elimizdiń barlyq óńirinde uıymdastyryla bastady. Jármeńkeniń basty ereksheligi — sharýalar aýylsharýashylyǵy ónimin deldalsyz tikeleı satady. Odan bólek jármeńkege birinshi kezekte áleýmettik mańyzy bar azyq-túlik taýarlary shyǵarylady. Jármeńkedegi oryndar sharýalarǵa tegin beriledi. Baǵa naryqtaǵy baǵadan keminde 20 paıyzǵa deıin tómen.
Jármeńkeler qazaqstandyqtardyń taǵatsyzdana kútetin saýda formatyna aınalǵan. Bıylǵy qyrkúıekten bastap eldegi jármeńkeler «Dala dámi» degen ortaq ataýmen uıymdastyrylǵan.
— Jármeńke halyq úshin saýdanyń jaqsy ortalyǵy bolyp tur. Demalys kúnderi kelemiz. Baǵasy tómen. 5-10 myń teńge bolsa da únemdeımiz. Sonda halyq qanshama qarjysyn únemdep jatyr, — dedi Aqtaý qalasynyń turǵyny Sábıt Saparǵul.
