Deldaldyq shemalar kesirinen azyq-túlik baǵalary negizsiz qoıylady - Erbolat Dosaev
Qala ákiminiń aıtýynsha, bul – shahardaǵy basty máselelerdiń biri.
«Keshe Memleket basshysy Qasym-Jomart Toqaev Qonaev qalasynda bizdegi azyq-túlik ınflıatsııasy 20%-ǵa jetkenin aıtty. Munda kóptegen faktor bar. Bul geosaıası jaǵdaı jáne janar-jaǵar maıdyń qymbattaýy túrindegi obektıvti sebepter der edim. Almaty qalasy kóp ımporttaıdy. Qazir biz basqa óńirlermen kelisip jatyrmyz. Mysaly, bizge Almaty oblysy, aýdandar kókónister men kúrish boıynsha qoldaý tanytty. Al, tótenshe jaǵdaılar sheńberinde Úkimetpen aldyn ala ýaǵdalastyq», - dedi qala ákimi.
Erbolat Dosaev sondaı-aq, qalada jyl sońyna deıin 85 myń tonna kóleminde áleýmettik mańyzy bar azyq-túlik ónimderin belgilengen baǵamen satý kelisilgenin aıtty.
«Astyq pen kúnbaǵys maıy boıynsha kelisimge qol jetkizildi. Qant, qaraqumyq jáne kúrishpen qamtamasyz etý boıynsha 6,4 mlrd teńge qarastyrdyq. Qazir Saýda mınıstrligi biryńǵaı baǵa boıynsha kelisim júrgizip jatyr, onyń nátıjesinde qalamyzyń óz kvotasy bolady. Almatyda deldaldyq shemalardyń kesirinen azyq-túlik baǵalary negizsiz qoıylady. Qazir qalanyń negizgi jetkizýshileri – bazarlar. Osy oraıda, keler jyldyń qańtar aıynan bastap iske asyrýdy josparlap otyrǵan sharalar kesheni daıyndaldy. Negizgi mindet – deldaldardy jetkizýshiler tizbeginen shyǵarý. Búginde olardyń qaladaǵy úlesi – 40-50%», - dedi Erbolat Dosaev.
