Deldaldar Astanadaǵy azyq-túlik baǵasyn 50 paıyzǵa deıin qymbattatyp otyr - ákimdik

ASTANA. QazAqparat – Astana qalasynyń Investıtsııalar jáne kásipkerlikti damytý basqarmasy basshysynyń orynbasary Maqsat Jańabaev elordada azyq-túlik baǵasynyń qymbattyǵyna qandaı faktorlar áser etip otyrǵanyn atady, dep habarlaıdy QazAqparat tilshisi.

«Azyq-túlik baǵasynyń ósýine negizinen deldaldyq shemalar áser etip otyr. Bul jerde azyq-túlik óndirýshiler baǵany kóterip jatpaǵanyn aıtý kerek. Baǵany deldaldar kóteredi. Solar baǵany 50 paıyzǵa deıin qoldan qymbattatady. Búgingi tańda bul baǵytta óńirlik komıssııamen birge jumys júrgizip jatyrmyz», - dedi ol baspasóz konferentsııasynda.

Aıtýynsha, atalǵan komıssııanyń 21 otyrysy ótken.

«Onyń 9-y kóshpeli komıssııa boldy. Sondaı-aq, saýdadaǵy ústemeaqyny 15 paıyzdan asyrmaýǵa baǵyttalǵan zańdy sharalardy túsindirý jumystaryn jalǵastyramyz», - dedi Maqsat Jańabaev.