«Delaıte» dedi: Sotta Sherzattyń ákesi men kýágerdi bettestirý kezindegi vıdeo kórsetildi

TALDYQORǴAN. KAZINFORM – Búgingi sot otyrysynda marqum Sherzat Polattyń ákesi Qarjaýbaı Nurymov pen iske kýáger retinde qatysyp jatqan Samat Abdyqadyr arasynda tergeýde bolǵan bettestirý kezindegi vıdeo kórsetildi.

Aıyptalýshylardyń advokattary sotqa kýáger Samat Abdyqadyrdyń kórsetýlerine qaıta oralyp, qajet bolǵan jaǵdaıda jábirlenýshi Qarjaýbaı Nurymovty qaıta shaqyrtýdy surady.

Qorǵaýshylardyń aıtýynsha, áleýmettik jelilerde adamdar kýágerge «delaıte» dep aıtyp, qandy oqıǵaǵa buıryq berdi degeni úshin jaýapqa tartýdy talap etip jatyr.

Vıdeoda Qarjaýbaı Nurymov oqıǵa bolǵan kúni janjalǵa qatysýshylarǵa Samat Abdyqadyr nusqaý jasap, «delaıte» dep aıtqanyn jetkizdi.

– Dúkenniń aldynda tóbeles bolmastan buryn Nurbol, Darhan degender jigitterin shaqyra bastady ǵoı. Sol kezde dúkenniń aldyna Accent jáne mersedes kóligi kelip toqtady. Bul jigit (Samat) tústi. Ol qyzyl aıaqkıimde, kúláparasy (kapıýshon) bar kıimde boldy. Onyń janynda taǵy eki jigit boldy. Eki kólik toqtap, Samat mersedestegi jigitterdiń bárimen amandasty. Nurbol, Darhan, Nurqııastarmen amandasty. Nurqanatpen de amandasyp, ekeýi sóılesip turyp qaldy. «Bir jerden kórdim ǵoı» degen sııaqty áńgime boldy. Men dúkenniń aldynda turdym. Nurqanatqa «men tóbelespeımin ǵoı, men shalmyn ǵoı, tóbelespeımin, men úshin jigitter sóılesedi» degen sóz shyqty aýzynan. Nurqanattan «bári durys pa?» dep surap edim, ol maǵan «durys, tanımyn ǵoı» dedi. Sosyn mynaý (Samat) «delaıte» dedi. Osy jigittiń aýzynan osy sóz shyqty, – deıdi Qarjaýbaı Nurymov vıdeoda.

Biraq Samat Abdyqadyr ony joqqa shyǵarady.

— Men «delaıte» dep múlde aıtqan joqpyn jáne tóbeleske de qatysym joq. Men bul jigitterdi tanymaımyn jáne olarmen amandaspadym, – dep jaýap berdi ol tergeýde bolǵan bettestirý kezinde tergeýshiniń suraqtaryna.

Buryn sotta Sherzattyń aǵasy Nurqanat Ǵaıypbaevtyń tergeý kezindegi beınejazbasy kórsetildi.

Sonymen qatar oqıǵa ornyna alǵash barǵan polıtseıler kýálik berdi.

Oǵan deıin sot otyrysynda kýáger Elmıra Nurbekova jaýap berdi.

Ekinshi kýáger qyz Dana Jaqsygeldi oqıǵa týraly baıandady.

Sotta Sherzattyń ákesi Qarjaýbaı Nurymov ol kıkiljiń qalaı bastalǵanyn aıtqan edi.