«Delta» shtamynan tolyq qorǵaný úshin qansha antıdene qajet

NUR-SULTAN. QazAqparat – Reseılik ǵalymdar zertteý júrgizip, onda koronavırýstan tolyq qorǵaný úshin adamda qansha antıdene bolý kerektigin anyqtady. Sondaı-aq, birneshe aıda COVID-19-dy qalaı jeńýge bolatynyn belgili boldy, dep jazady «Izvestııa» gazeti.

Gamaleıa atyndaǵy ortalyq dırektory Aleksandr Gıntsbýrg zertteý Máskeý densaýlyq saqtaý departamentimen birlesip júrgizilgenin aıtty. Oǵan Máskeýdiń 4 myń turǵyny qatysqan.

«300 antıdene (halyqaralyq birlik) «deltadan» tolyq qorǵaıtynyn anyqtadyq. Eger odan az bolsa, «Spýtnık Laıt» vaktsınasyn saldyrý qajet. Eger «Laıt» vaktsınasynyń nátıjesinde 350-400 antıdene bolsa, onda «Spýtnıktiń» ekinshi dozasyn egý qajet. Al, eger sizde 500 birlikten kóp bolsa, onda siz COVID-19 juqtyrmaısyz degen sóz», - dep túsindirdi ǵalym.

Sondaı-aq, ol Reseı men basqa da elderdegi shekteý sharalary týraly aıtty. Reseılik ǵalym koronavırýsty birneshe aıda jeńý úshin qansha adam egilý keregin aıtty.

«Shekteý sharalary vaktsınalaýdan bólek eshqandaı paıda ákelmeıdi. Egilgen adamdar sany birden artsa ǵana kómek beredi. Sergeı Sobıanın sońǵy on kúnde vaktsına saldyrǵandar sany tórt ese (kúnine) artqanyn aıtty. Bul kórsetkish, on ese joǵarylaýy qajet. Sonda ǵana ınfektsııany birneshe aıda jeńýge bolady. Buǵan qosa, egilgender men vaktsına almaǵandardy eki bólek ustaǵan durys bolar edi. Antıdenesi úsh júzden asatyndardy shektemeýge bolady», - dedi Gıntsbýrg.