Dekrettik demalysta júrgen analardyń zeınetaqy jınaǵy qalaı tolyqtyrylady
ASTANA. KAZINFORM – Qazaqstanda bala kútimine baılanysty demalysta júrgen áıelderdiń zeınetaqy jınaqtary tolyqtyrylyp otyrady. Bul úshin analardyń qosymsha ótinish berýi qajet emes, jarnalar avtomatty túrde aýdarylady.
Qoldanystaǵy tártipke sáıkes, bala kútimimen otyrǵan áıelder 1,5 jyl boıy Memlekettik áleýmettik saqtandyrý qorynan áleýmettik tólem alady.
Osy tólemderden mindetti zeınetaqy jarnalary ustalyp, Biryńǵaı jınaqtaýshy zeınetaqy qoryndaǵy (BJZQ) jeke zeınetaqy shotyna aýdarylady.
Bul tártip zańnamaǵa engizilgen ózgeristerden keıin de saqtalady.
- Sonymen qatar bala kútimine baılanysty demalys kezeńi bazalyq zeınetaqyny esepteý kezinde eńbek ótili retinde eskeriledi. Demek, bala kútimine jumsalǵan ýaqyt bolashaqta bazalyq zeınetaqy mólsherin aıqyndaýǵa da áser etedi, - delingen Eńbek jáne halyqty áleýmettik qorǵaý mınıstrligi taratqan aqparatta.
Osylaısha, ana dekrettik demalysta bolǵan kezde de onyń zeınetaqy jınaqtary tolyqtyrylyp, jarnalardy aýdarý úderisi avtomatty túrde júzege asyrylady.
Aıta keteıik, buǵan deıin bala kútimine baılanysty áleýmettik tólemnen 10% mindetti zeınetaqy jarnasy ustalyp, alýshynyń BJZQ-daǵy jeke shotyna aýdarylatyny habarlanǵan bolatyn.
