Áıelderdi «mıllıonmen dekretke» shyǵarǵan aqtóbelikter aqshany keri qaıtarýy tıis

AQTÓBE. KAZINFORM — Bir qylmystyq is aıaqtalyp, aqshany óndirý azamattyq tártippep qaralyp jatyr. Oblystyq ekonomıkalyq tergep-tekserý departamenti taǵy 2 is boıynsha tergeýge kiristi.

Aqtóbe oblystyq ekonomıkalyq tergep-tekserý departamenti Memlekettik-áleýmettik saqtandyrý qorynan áleýmettik tólemdi zańsyz alǵan 2 aqtóbelikti anyqtap, is sotqa jetti. Sottalýshylar 2023-2024 jyldar aralyǵynda «dekretke mıllıonmen» qyzmetin jarnamalap, júkti áıelderdi jeke kásipker, jumysshy retinde tirkeıdi. Jalǵan esep júrgizip, mindetti tólemderdi aýdarady. 

— Nátıjesinde 10 adam zańsyz shemanyń qatysýshysy boldy. Qarjynyń bir bóligin, ıaǵnı áleýmettik tólem aýdarylǵannan keıin ár áıelden 532 000 — 2 200 000 teńge alǵan. Tergeý kezinde júktilik pen bosanǵannan keıin alǵan áleýmettik tólemniń jalpy somasy 98 mln teńge boldy. Zańsyz jolmen 20 mln teńge paıda tapqan. Aıyptalýshylar kináli dep tanylyp, 5 jyl 6 aı jáne 6 jyl bas bostandyǵynan aıyryldy. Olardyń jyljymaıtyn múlki men kóligi tárkilendi. Biraq úkim áli zańdy kúshine enbedi, — dedi Aqtóbe oblystyq ekonomıkalyq tergep-tekserý departamenti basqarmasynyń basshysy Jadan Bısembın.

Qazirgi kezde taǵy 2 qylmystyq is tirkelip, tergeý júrip jatyr. Bul iste de «dekretke mıllıonmen» shemasy bar. 

Eske salsaq, Qyzylorda qalasynyń turǵyndary Janerke Ábdimálikova jáne Juldyzaı Bakırova júktilikke jáne bosanýǵa, sondaı-aq bir jarym jasqa tolǵanǵa deıin bala kútimine baılanysty tabysynan ýaqytsha aıyrylǵan áıelderge arnalǵan áleýmettik tólemderdi eselep alý úshin zańsyz shema uıymdastyrǵan. Nátıjesinde J.Ábdimálikova 34 áıelge, J.Bakırova 20 áıelge zańsyz qujat rásimdegen. Ekeýi de bas bostandyǵynan aıyryldy.