Dekretke mıllıonmen: Memleketke 180 mln teńge zalal keltirgen aqtóbelik sottaldy
AQTÓBE. KAZINFORM – Esepshi sot úkimimen 5 jyl 6 aıǵa bas bostandyǵynan aıyryldy. Alaıda jazasyn 5 jyldan soń óteıdi.
Qylmystyq is Muǵaljar aýdandyq sotynda qaraldy. Býhgalterlik esep jáne salyq salasyn erkin meńgergen sottalýshyǵa Qylmystyq kodekstiń «Alaıaqtyq» baby boıynsha aıyp taǵyldy.
Іs materıalyna súıensek, sottalýshy «Dekretke mıllıonmen» kýrsyna qatysyp, tájirıbe jınaıdy. 2023-2024 jyldar aralyǵynda jeke kásipkerlikti paıdalanyp, júkti áıelderdi tirkeıdi, olarǵa aı saıyn mindetti áleýmettik, zeınetaqy aýdarymdaryn jáne medıtsınalyq saqtandyrý jarnalaryn aýdarady. Al júkti kelinshekter bosanǵanǵa deıin jáne keıin mıllıondar alǵan. Memleketke jalpy somasy 180 413 146 teńge kóleminde zalal keltirgen. Sot otyrysynda sottalýshy taǵylǵan aıypty ishinara moıyndady.
- Sot úkimimen sottalýshy Qylmystyq kodekstiń 190-baby 4-bóliginiń 2-tarmaǵynda kózdelgen qylmysty jasaǵany úshin kináli dep tanylyp, 5 jyl 6 aı merzimge bas bostandyǵynan aıyrý jazasy taǵaıyndaldy. Qylmystyq kodekstiń 74-babynyń 1-bóligine sáıkes jazany óteý merzimi 5 jylǵa keıinge qaldyryldy. Jábirelenýshiniń azamattyq talaby azamattyq sot isin júrgizý tártibimen qaraýǵa joldandy. Úkim zańdy kúshine engen joq,- dep habarlady Muǵaljar aýdandyq sotynyń baspasóz qyzmeti.
Aıta keteıik, áıelderdi «mıllıonmen dekretke» shyǵarǵan aqtóbelikter aqshany keri qaıtarýy tıis. Dál osyndaı isti oblystyq ekonomıkalyq tergep-tekserý departamenti tergedi.