Dekretke mıllıonmen: Qyzylordada júkti áıelderge zańsyz tólem alyp bergender sottaldy

QYZYLORDA. KAZINFORM – Qyzylorda oblysy boıynsha ekonomıkalyq tergep-tekserý departamenti júktilik pen bala kútimine baılanysty zańsyz áleýmettik tólemder alyp berýmen aınalysqan tulǵalardyń qylmystyq áreketin áshkereledi. Bul týraly óńirlik departamenttiń baspasóz qyzmeti habarlady. 

Qyzylorda qalasynyń turǵyndary Janerke Ábdimálikova jáne Juldyzaı Bakırova júktilikke jáne bosanýǵa, sondaı-aq bir jarym jasqa tolǵanǵa deıin bala kútimine baılanysty tabysynan ýaqytsha aıyrylǵan áıelderge arnalǵan áleýmettik tólemderdi eselep alý úshin zańsyz shema uıymdastyrǵan.

– Olar júkti áıelderdi belgili bir jeke kásipkerdiń jaldamaly qyzmetkeri retinde kórsetip, olardyń atyna mindetti zeınetaqy jarnalary men áleýmettik aýdarymdar aýdarǵan. Keıin júktilikke jáne bosanýǵa baılanysty eńbekke ýaqytsha jaramsyzdyq paraǵyn rásimdep bergen. Nátıjesinde J.Ábdimálikova 34 áıelge, J.Bakırova 20 áıelge zańsyz qujat rásimdegen. Tergeý barysynda atalǵan azamatshalardyń shyn máninde jeke kásipkerlerdiń qaramaǵynda jumys istemegeni anyqtaldy. Kásipkerlerdiń ózderi jaldamaly qyzmetkerler tiziminde bul azamatshalar baryn bilmegen. Sonymen birge kásipkerler elektrondyq tsıfrlyq qoltańbalaryn (ETsQ) tek salyqtyq eseptilikti tapsyrý úshin bergenin málimdegen, - delingen habarlamada. 

Sot úkimimen J.Ábdimálikova 3 jyl 4 aı merzimge bas bostandyǵynan aıyryldy. Al J.Bakırova 2 jyl 4 aı merzimge shartty túrde sottaldy.

Buǵan deıin biz QR UEM Tabıǵı monopolııalardy retteý komıtetiniń Qyzylorda oblysy boıynsha departamenti syrtqy aýanyń naqty temperatýrasyn eskere otyryp, jylýmen jabdyqtaýshy mekemelerdiń qyzmet qunyn qaıta eseptegenin jazǵan edik.